Crop Advisory : कृषी सल्ला : कोकण विभाग

Indian Agriculture :

विशेष सल्ला

सध्याच्या पावसाच्या कालावधीमध्ये पिकावर कीड व रोग नियंत्रणासाठी करण्यात येणारी रासायनिक फवारणी अधिक प्रभावी होण्याकरिता फवारणी द्रावणात स्टीकर (चिकटणारा पदार्थ) मिसळून फवारणी करावी.

भात खाचरातील बांधावरील गवत काढून बांध तणमुक्त ठेवावेत. जेणेकरून किडींच्या खाद्य वनस्पतीचा समूळ नायनाट होऊन भात पिकावर किडींचा प्रादुर्भाव रोखला जाईल.

खरीप भात :

फुटवे अवस्था

भात खाचरात पाणी साठविण्यासाठी बांधबंदिस्ती करून पाणी बांधून ठेवावे. पाण्याची पातळी ५ सें.मी. पर्यंत नियंत्रित करावी. अतिरिक्त पाण्याचा निचरा होण्याची व्यवस्था करावी. प्रसंगी गरज भासल्यास बाह्य स्रोतांतून पाणी देण्याची व्यवस्था करावी.

भात पिकावर निळे भुंगेरे, सुरळीतील अळी आणि पाने गुंडाळणाऱ्या अळीचा प्रादुर्भाव दिसून येण्याची शक्यता असल्याने पिकाचे सातत्याने निरीक्षण करावे. तसेच खाचरात पाणी खेळते राहील असे पहावे. खाचरात पाणी जास्त काळ न साठवता २ ते ३ दिवसांच्या अंतराने फोडून लावावे व नवीन पाणी साठवण्याची व्यवस्था करावी. जेणेकरून पिकावर किडींचा प्रादुर्भाव होण्यापासून रोखले जाईल.

आंबा :

नवीन लागवड केलेल्या आंब्याच्या पालवीवर शेंडे पोखरणारी अळीचा प्रादुर्भाव दिसून येण्याची शक्यता असते. त्यासाठी पालवीचे सातत्याने निरीक्षण करावे. नवीन लागवडीमध्ये प्रादुर्भाव दिसून आल्यास कीडग्रस्त शेंडे, काड्या काढून अळीसह नष्ट कराव्यात. पावसाची किमान ५ ते ६ तास उघडीप मिळेल असे पाहून रासायनिक फवारणीचे नियोजन करावे.

काजू :

वाढीची अवस्था

काजू बागेस खते देण्याची कामे पूर्ण करून घ्यावीत. काजूच्या ४ वर्षांवरील प्रति कलमास ४० किलो शेणखत, २ किलो युरिया, १.५ किलो सिंगल सुपर फॉस्फेट आणि ५०० ग्रॅम म्युरेट ऑफ पोटॅश खते द्यावीत. खतमात्रा कलमाच्या विस्ताराच्या थोडे आत बांगडी पद्धतीने चरात देऊन चर बुजवून घ्यावा.

वर दिलेली खताची मात्रा चार वर्षांपेक्षा कमी वयाच्या लागवडीस देताना पहिल्या वर्षी १/४, दुसऱ्या वर्षी १/२, तिसऱ्या वर्षी ३/४ पट मात्रा व चौथ्या वर्षी आणि त्यावरील झाडांना खतांची संपूर्ण मात्रा द्यावी.

सुपारी :

फळधारणा

सुपारीच्या ३ वर्षांवरील प्रति झाडास १० किलो शेणखत, १२ किलो हिरवळीचे खत, १६० ग्रॅम युरिया, ५०० ग्रॅम सिंगल सुपर फॉस्फेट आणि १२५ ग्रॅम म्युरेट ऑफ पोटॅश खतांची पहिली मात्रा बुंध्यापासून १ मीटर अंतरावर १५ ते २० सेंमी खोल आणि २० सेंमी रुंदीच्या चरात बांगडी पद्धतीने द्यावीत.

वर दिलेली खताची मात्रा तीन वर्षांपेक्षा कमी वयाच्या लागवडीस देताना पहिल्या वर्षी १/३ पट आणि दुसऱ्या वर्षी २/३ पट या प्रमाणे देण्यात यावी.  सुपारी तडकण्याचे प्रमाण कमी करण्यासाठी शिफारस केलेल्या खतांबरोबर ६०० ग्रॅम सूक्ष्म अन्नद्रव्ये (बोरॉन ६० ग्रॅम, झिंक ३०० ग्रॅम, मँगेनीज ६० ग्रॅम, लोह १२० ग्रॅम आणि कॉपर ३० ग्रॅम) पहिल्या मात्रेबरोबर जमिनीतून देण्यात यावी.

(०२३५८) २८२३८७/ ८१४९४६७४०१

(ग्रामीण कृषी मौसम सेवा, डॉ. बाळासाहेब सावंत कोकण कृषी विद्यापीठ, दापोली)