Parbhani News : कोरडवाहू शेती ही पावसावर आधारित आहे. हवामान बदलानुरुप तंत्रज्ञानाचा अंगीकार करून कोरडवाहू शेतीतील पीक उत्पादनात वाढ करणे शक्य आहे. माती व पाणी या नैसर्गिक संसाधनाचे संवर्धन करणे आवश्‍यक आहे.
एकात्मिक शेती पद्धती, विद्यापीठाने विकसित वाण व कोरडवाहू शेती संशोधन केंद्राने विकसित केलेले विहीर, कूपनलिका पुनर्भरण तंत्रज्ञानाचा अवलंब शेतकऱ्यांनी करणे गरजेचे आहे, असे प्रतिपादन कुलगुरू डॉ. इंद्र मणी यांनी केले.
वसंतराव नाईक मराठवाडा कृषी विद्यापीठातील अखिल भारतीय समन्वयित कोरडवाहू शेती संशोधन प्रकल्पातर्फे गुरुवारी (ता. १५) आयोजित खरीप हंगाम नियोजन व शेतकरी मेळाव्‍यात ते बोलत होते.
या वेळी संशोधन संचालक डॉ. दत्तप्रसाद वासकर, विद्यापीठ कार्यकारी परिषदेचे सदस्‍य प्रवीण देशमुख, कोरडवाहू शेती संशोधन केंद्राचे मुख्यशास्त्रज्ञ डॉ. वासुदेव नारखेडे सरपंच रामदास दळवे (बाभुळगाव), विठ्ठल धोतरे (उजंळबा), मारोती कदम (सोन्ना), बालासाहेब ढोले (आडगाव), डॉ. मदन पेंडके, डॉ. पपिता गौरखेडे आदींची उपस्थिती होती.
कोरडवाहू शेती संशोधन केंद्रामार्फत हवामान बदलानुरूप राष्ट्रीय कृषी उपक्रम बाभूळगाव, उजळंबा, सोन्ना (सर्व ता. परभणी) या गावात शेतकऱ्यांच्या शेतावर राबविण्यात येत आहे. कोरडवाहू एकात्मिक शेती पद्धती प्रकल्प आडगाव (ता. पालम) येथील शेतकऱ्यांच्या शेतावर राबविण्यात येतो. या प्रकल्‍पांतर्गत निवडक शेतकऱ्यांना खरीप पीक प्रात्यक्षिकांसाठी विद्यापीठ विकसित केलेल्या सोयाबीन, तूर आदी पिकांच्या वाणांचे बियाण्याचे वाटप करण्यात आले.
डॉ. नारखेडे यांनी आंतरपीक पद्धती व एकात्मिक शेती पद्धती, एकात्मिक अन्नद्रव्ये व्यवस्थापन, आपत्कालीन पीक नियोजन, मूलस्थानी जलसंधारण याबद्दल मार्गदर्शन केले. प्रास्ताविक डॉ. पेंडके यांनी केले. सूत्रसंचालन डॉ. गौरखेडे यांनी केले, तर आम्रपाली गुजंकर यांनी आभार मानले. यशस्वितेसाठी मंगेश राऊत, शिवाजी काळे, विलास रिठे, मोरेश्‍वर राठोड, सुमीत सूर्यवंशी आदींनी पुढाकार घेतला.
Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.
ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
