Agriculture Scheme : शेतीमाल तारणकर्ज योजनेसाठी एक कोटी रुपये निधी

Parbhani News : परभणी कृषी उत्पन्न बाजार समिती गत १३ वर्षांपासून स्वनिधीतून शेतीमाल तारणकर्ज योजना राबवीत आहे. चालू आर्थिक वर्षात शेतीमाल तारणकर्ज योजने अंतर्गत एक कोटी रुपये निधीची तरतूद केली आहे. शेतकऱ्यांच्या हितासाठी सदैव तत्पर राहणार आहोत, असे प्रतिपादन बाजार समितीचे सभापती पंढरीनाथ घुले यांनी केले.

कृषी उत्पन्न बाजार समितीची वार्षिक सर्वसाधारण सभा सभापती घुले यांच्या अध्यक्षतेखाली शुक्रवारी (ता. २९) पार पडली. बाजार समितीचे उपसभापती अजय चव्हाण, संचालक सर्वश्री गणेश घाटगे, संग्राम जामकर, गंगाप्रसाद आणेराव, पांडुरंग खिल्लारे, अरविंद देशमुख, रावसाहेब रेंगे, मुंजाजी जवंजाळ, रमेश देशमुख, फैजुल्ला खान पठाण, सचिव संजय तळणीकर आदी उपस्थित होते.

घुले म्हणाले, की परभणी बाजार समितीत मराठवाड्यात सर्व प्रथम कॉटन टेक्नॉलॉजी मिशन (टी. एम. सी.) योजनेअंतर्गत मार्केट यार्डात येणाऱ्या शेतीमालाची संगणकीय जाहीर लिलावाद्वारे विक्रीची व्यवस्था आहे. मुख्य बाजार आवारात धान्यचाळणी यंत्र कार्यान्वित केले आहे. शेतकऱ्यांना सोयाबीन, तूर, हरभरा, गहू, ज्वारी आदी शेतीमाल माफक दरात चाळणी करुन दिल्या जात आहे. त्यामुळे जास्तीत जास्त बाजार भाव मिळत आहे.

पेडगाव येथील उपबाजार पेठेत धान्य चाळणी यंत्र, कोल्ड स्टोअरेज रायपनिंग चेंबरचे काम हाती घेतले आहे. त्यापैकी ३० गाळे व १००० टन साठवणूक क्षमतेच्या गोदामाचे बांधकाम प्रगतिपथावर आहे. दैठणा येथील उपबाजार पेठेत १००० टन साठवणूक क्षमतेचा गोदाम उभारण्यात येणार आहे.

गतवर्षी सोयाबीन, तूर हरभरा या शेतीमालासाठी एकूण ६५ शेतकऱ्यांना ८६ लाख ५७ हजार रुपये तारण कर्जवाटप केले. सचिव तळणीकर यांनी मागील सभेचे इतिवृत्त, लेखा परीक्षण केलेल्या लेख्यांचे तव्दतच जमा खर्च, वार्षिक प्रशासकीय अहवालातील मुद्यांबाबत संक्षिप्त माहिती दिली. सभेस बाजार समितीच्या कार्यक्षेत्रातील विविध कार्यकारी सेवा सहकारी संस्थेचे अध्यक्ष, सरपंच, व्यापारी, हमाल प्रतिनिधी, बाजार समितीचे अधिकारी, कर्मचारी उपस्थित होते.