Natural Sugar Mill : कर्जमुक्त होऊन ‘नॅचरल’ला ७६ कोटी रुपयांवर नफा

Dharashiv News : ‘‘नॅचरल उद्योग समूह कर्जमुक्त झाला आहे. या शिवाय वर्षात ७६ कोटी २९ लाख रुपये नफा झाला आहे. त्यातून कारखान्याच्या सभासदांना २५ टक्के लाभांश देण्यात येईल. सभासदांना लाभांश देणारा देशांतील पहिला साखर उद्योग आहे,’’ अशी माहिती उद्योग समूहाचे संस्थापक अध्यक्ष बी. बी. ठोंबरे यांनी दिली

नॅचरल शुगर अॅण्ड अलाईड इंडस्ट्रीज लि. साईनगर रांजणी या कारखान्याची २४ वी वार्षिक सर्व साधारण सभा श्री. ठोंबरे यांच्या अध्यक्षतेखाली नुकतीच झाली. या वेळी अनिल ठोंबरे, हर्षल ठोंबरे, बिभीषण भातलंवडे, सुनील कोचेटा, प्रभावती गोरे, राजपाल माने, किशोर डाळे उपस्थित होते.

ठोंबरे म्हणाले,‘‘उसाचे अपेक्षित गाळप होऊनही साखर कारखाना युनिट तोट्यात जाऊनही केवळ उपपदार्थ निर्मितीमुळे नॅचरल शुगर नफ्यात आहे. साखर उद्योग यशस्वी करून दाखवण्याचे काम नॅचरल शुगरने केले आहे.

ऊस गाळपाबरोबरच उपपदार्थ निर्मितीमधून वीज निर्मिती, इथेनॉल व बायो सीएनजी प्रकल्प, डेअरी प्रकल्पामुळे कारखाना नफ्यात आहे. साखर उद्योग टिकवायचा असेल तर साखर उत्पादनाबरोबरच उपपदार्थ निर्मिती करून त्या मधून नफा मिळवावा लागेल. या वर्षात ‘नॅचरल’ने सर्वाधिक ऊस दर दिला आहे.’’

‘‘चालू हंगामात प्रतिदिन ७५०० टन गाळप करण्यात येईल. या वर्षी हंगामात १२ लाख टन गाळपाचे उद्दिष्ट आहे. साखर कारखाना, डिस्टिलरी आणि दूध डेअरीतून जास्तीत जास्त उत्पादन घेऊन शेतकऱ्यांचे हीत जोपासण्याचा प्रयत्न आहे,’’ असेही श्री. ठोंबरे म्हणाले.