Fertilizer Stock : रत्नागिरी जिल्ह्यासाठी ६,३०० टन खत उपलब्ध

Ratnagiri Fertilizer Update : खरीप हंगामात जिल्ह्यात शेतकऱ्यांना वेळेत खतपुरवठा करण्यासाठी जिल्हा परिषद कृषी विभाग प्रयत्न करत आहे. जिल्ह्याला सुमारे १२ हजार टन मंजूर खतसाठ्यापैकी ६ हजार ३०० टन खत शासनाकडून उपलब्ध झाले आहे. ते जिल्ह्यातील विकास सहकारी सोसायटींच्या माध्यमातून शेतकऱ्यांना देण्यात येत आहे.

जिल्ह्यातील एकूण खरीप पिकाखालील क्षेत्र सुमारे ८१ हजार ९९५ हेक्टर आहे. खरीप भातपिकाखालील क्षेत्र सुमारे ६८ हजार हेक्टर, नागली क्षेत्र सुमारे १० हजार २३६ हेक्टर एवढे आहे.

यावर्षी २०२३-२४ च्या खरीप हंगामासाठी २१ हजार टन खताची मागणी करण्यात आली होती. त्यापैकी सुमारे १२ हजार ७४० टन खत मंजूर झाले आहे. खरीप काळात जिल्ह्यातील शेतकऱ्यांना वेळेत खतपुरवठा होण्यासाठी जिल्हा कृषी विभागाकडून खबरदारी घेण्यात आली आहे.

अजूनही पावसाला सुरुवात झालेली नाही. त्यामुळे शेतीची कामे रखडली. तरीही भविष्यात खताची अडचण होऊ नये यासाठी शेतकरी खत विकत घेत आहे.

आतापर्यंत रेल्वेच्या टप्प्याटप्प्याने खत दाखल झाले आहेत. मंजूर खताच्या तुलनेत ४० टक्के खत प्राप्त झाले. हे खत प्रत्येक सोसायटीला समान वाटप करण्यात आले.

तरीही अजून शेतकऱ्यांना खत पुरवठा झालेला नाही. जून महिन्यात येणारा अपेक्षित साठा जिल्ह्याला प्राप्त झाला आहे. येत्या चार दिवसांत अजून एक मोठी खताची रेक दाखल होणार आहे. त्यामधून सुमारे दीड हजार टन खत मिळेल, असे कृषी विभागाकडून सांगण्यात आले.