Grape Farmer Fraud : द्राक्ष बागायतदारांची ५० कोटींची फसवणूक

Nashik News : नाशिक जिल्ह्यातील द्राक्ष बागायतदारांनी त्यांच्या द्राक्षमाल व्यवहारातील पैशांची फसवणूक झाल्याच्या लेखी स्वरूपात तक्रारी व निवेदने आलेली आहेत.

यात जिल्ह्यातील ५०० पेक्षा अधिक द्राक्ष बागायतदारांची स्थानिक व्यापारी व निर्यातदारांकडून गत हंगामात सुमारे ५० कोटींहून अधिक रकमेची फसवणूक झाल्याचे समोर आले आहे. अजून अर्ज येत असून यात वाढ होत असल्याची माहिती महाराष्ट्र राज्य द्राक्ष बागायतदार संघाचे अध्यक्ष कैलास भोसले यांनी दिली.

महाराष्ट्र राज्य द्राक्ष बागायतदार संघाच्या ओझर येथील विभागीय कार्यालयात झालेल्या बैठकीत श्री. भोसले बोलत होते. भोसले म्हणाले, की उपमुख्यमंत्री अजित पवार यांची मुंबई येथे द्राक्ष बागायतदारांच्या विविध प्रश्नांसंदर्भात भेट घेतली होती.

त्यामध्ये बागायतदारांची देशांतर्गत व्यापारी तसेच निर्यातदारांकडून झालेल्या फसवणुकीची माहिती दिली होती. त्यावर उपमुख्यमंत्री अजित पवार यांनी नाशिक परिक्षेत्राचे विशेष पोलिस महानिरीक्षक दत्तात्रय कराळे यांना यासंदर्भात लक्ष घालून कारवाई करण्याचे निर्देश दिले आहेत.

त्यानुसार कैलास भोसले, नाशिक विभागीय अध्यक्ष बाळासाहेब गडाख, सचिव बबनराव भालेराव, संचालक अॅड. रवींद्र निमसे आदींसह शिष्टमंडळाने दत्तात्रय कराळे यांची भेट घेऊन झालेल्या फसवणुकीच्या अनुषंगाने सविस्तर माहिती दिली.