Farmer Accident Insurance : अपघात विम्यापोटी ४८ कोटी मंजूर

Mumbai News : गोपीनाथ मुंडे शेतकरी अपघात विमा योजनेअंतर्गत कृषी विभागाने २४५३ दावे निकाली काढले असून, त्यापोटी ४८ कोटी ६३ लाख रुपये वितरित करण्यास मान्यता दिली आहे.

राज्यात २३ ऑगस्ट २०२२ ते १८ एप्रिल २०२३ या कालावधीतील २३७६ दावे निकाली काढले असून, त्यापोटी ४७ कोटी १२ लाख तर ७ एप्रिल ते २२ ऑगस्ट २०२२ या १३८ दिवसांच्या खंडित कालावधीतील ७७ दाव्यांपोटी १ कोटी ५१ लाख रुपयांचा विमा वितरित करण्यात येणार आहे.

राज्यातील शेतकऱ्यांना अपघातात अपंगत्व अथवा मृत्यू आल्यास त्यांना भरपाई देण्यासाठी गोपीनाथ मुंडे शेतकरी अपघात विमा योजना लागू करण्यात आली आहे.

या योजनेची मुदत ७ एप्रिल २०२२ रोजी संपली होती. प्रशासकीय कारणांमुळे ही योजना लागू झाली नसल्याने शेतकऱ्यांना विमा संरक्षण मिळाले नव्हते.

त्यानंतर २२ ऑगस्ट रोजी ही योजना पुन्हा लागू करण्यात आली होती. त्यामुळे एप्रिल ते ऑगस्टमधील १३८ दिवसांच्या खंडित कालावधीत शेतकऱ्यांचे दावे निकाली काढण्यासाठी विशेष बाब म्हणून मान्यता दिली होती.

त्यानंतर १७ कोटी ८३ लाख रुपये वितरित करण्यात आले होते. या खंडित कालावधीतील ७७ दावे निकाली काढणे बाकी होते. त्यातील ७३ प्रकरणे मृत्यूची, तर ४ प्रकरणे अपंगत्वाची होती.

त्या शेतकऱ्यांच्या वारसांना आता एक कोटी ५१ लाख रुपये वितरित करण्यात येणार आहे. याच टप्प्यातील २३९ दावे निकाली काढण्यात आले असून, त्यातील २३७ मृत्यू, तर २ अपंगत्व आलेल्या शेतकऱ्यांच्या वारसांना ४२ कोटी ३६ लाख रुपयांची भरपाई देण्यास मंजुरी देण्यात आली आहे.

दुसऱ्या टप्प्यातील २१३७ प्रकरणे निकाली काढण्यात आली असून, २९३७ शेतकऱ्यांचा मृत्यू झाला असून, ४३ शेतकऱ्यांना अपंगत्व आले आहे. हे दावे निकाली काढण्यासाठी ४२ कोटी ३६ लाख रुपये वारसांना वितरित करण्यात येणार आहेत.

गोपीनाथ मुंडे शेतकरी अपघात विमा योजनेतील दावे
दावे : २४५३
शेतकरी मृत्यू : २३९८
शेतकरी अपंगत्व : ४९
भरपाई रक्कम : ४८ कोटी ६३ लाख