Sangli Apmc Election : सांगली बाजार समितीसाठी शेवटच्या दिवशी ४१३ अर्ज

Sangli Apmc Election Update : सांगली कृषी उत्पन्न बाजार समितीच्या (Sangli Agriculture Produce Market Committee) पंचवार्षिक निवडणुकीसाठी विक्रमी ५९८ उमेदवारी अर्ज दाखल झाले. अर्ज भरण्याच्या शेवटच्या दिवशी तब्बल ४१३ जणांनी अर्ज भरले.

नेत्यांचे पुत्र, नातेवाईक यांनी उमेदवारी अर्ज दाखल केले आहेत. त्यामुळे निवडणूक चांगलीच रंगणार असल्याचे चित्र आहे. उमेदवारी अर्जांची छाननी बुधवारी (ता. ५) होणार आहे.

सांगलीसह जिल्ह्यातील सात बाजार समित्यांसाठी मार्चच्या अखेरीस निवडणुकीचा कार्यक्रम जाहीर केला आहे. सांगली बाजार समितीसाठी २८ एप्रिलला मतदान होणार आहे.

सांगली कृषी उत्पन्न बाजार समितीसाठी सोसायटी गट सर्वसाधारण गटामधून २१३, सोसायटी गट महिला राखीव ५०, सोसायटी गट नागरिकांचा मागास प्रवर्ग ४८, सोसायटी गट भ. वि. जा. अ. ५२, ग्रामपंचायत गट सर्वसाधारण १२३,

ग्रामपंचायत अनु. जाती व जमाती ३०, ग्रामपंचायत आर्थिकदृष्टया दुर्बल गट ३१, अडते व व्यापारी गट ३४ व हमाल तोलाईदार गटातून १७ अर्ज दाखल झाले. बाजार समितीच्या इतिहासात सर्वाधिक उमेदवारी अर्ज दाखल झाले आहेत.

बाजार समितीनिहाय दाखल अर्जांची संख्या

तासगाव बाजार समिती - १६८

आटपाडी बाजार समिती -१६७

इस्लामपूर समिती - ९६

शिराळा समिती - ५९

पलूस समिती - १४२