Natural Farming : नांदेडला साडेतीन हजार हेक्टरवर नैसर्गिक शेती

कृष्णा जोमेगावकर : ॲग्रोवन वृत्तसेवा

Nanded News : नांदेड : राष्ट्रीय नैसर्गिक शेती अभियान ही केंद्र पुरस्कृत योजना नांदेड जिल्ह्यात २०२४-२५ पासून राबविण्यात येत आहे. यात एक गट ५० हेक्टरचा आहे. जिल्ह्यात एकूण ७० गटांअंतर्गत जिल्ह्यात तीन हजार ५०० हेक्टर क्षेत्रावर हा कार्यक्रम राबविण्यात येत आहे, अशी माहिती जिल्हा अधीक्षक कृषी अधिकारी दत्तकुमार कळसाईत यांनी ‘ॲग्रोवन’शी बोलताना दिली.

नैसर्गिक शेतीला प्रोत्साहन देण्यासाठी राष्ट्रीय नैसर्गिक शेती अभियानाची नांदेड जिल्ह्यामध्ये अंमलबजावणी केली जात आहे. नैसर्गिक शेती ही स्थानिक पशुधन आणि स्थानिक पातळीवर उपलब्ध संसाधनावर आधारित आणि भारतीय परंपरेत रुजलेली रसायनमुक्त शेती पद्धती आहे.

शेतकऱ्यांचा उत्पादन खर्च कमी करणे, बाह्य निविष्ठा खरेदी न करणे, निसर्गावर आधारित शाश्वत शेतीप्रणाली विकसित करणे, मातीचे आरोग्य आणि सुपीकता पुनरुज्जीवीत करणे, पाण्याची गुणवत्ता वाढविणे, जैवविविधता जतन करणे आणि शेतकरी, त्यांचे कुटुंब आणि ग्राहकांना सुरक्षित, आरोग्यदायी आणि पौष्टीक अन्न पुरविणे हे या अभियानाचे मुख्य उद्दिष्ट आहे.

नांदेड जिल्ह्यात २०२४-२५ या वर्षात राष्ट्रीय नैसर्गिक शेती अभियान राबविण्यात येत आहे. जिल्ह्यातील १६ तालुक्यांत योजनेची अमलबजावणी होणार आहे. प्रत्येक तालुक्यात तीन ते चार गटांची स्थापना करण्यात येत आहे. एका गटात १२५ एकर शेती व १२५ शेतकऱ्यांचा समावेश आहे. गटातील प्रत्येक शेतकऱ्याची निवड झाल्यानंतर त्या शेतकऱ्याची एक एकर जमीन नैसर्गिकरित्या कसण्यावर भर देण्यात येणार असल्याचे जिल्हा अधीक्षक कृषी अधिकारी दत्तकुमार कळसाईत यांनी सांगितले.

निसर्गावर आधारित शाश्वत शेतीच्या प्रणालींना चालना देण्यासाठी शेतात निविष्ठा निर्मिती करून निविष्ठा खरेदीवरील खर्च कमी करणे, मातीचे आरोग्य सुधारणे, देशी पशुधन लोकप्रिय करण्यासाठी नैसर्गिक शेती अभियान राबविण्यात येणार आहे.

- दत्तकुमार कळसाईत, जिल्हा अधीक्षक कृषी अधिकारी, नांदेड