Water Stock : भामा आसखेड धरणात ३० टक्के पाणीसाठा जमा

Pune News : खेड, शिरूरसह पुणे शहराच्या पूर्व भागाला वरदान ठरलेल्या भामा आसखेड ( ता. खेड) धरणात सोमवारपर्यंत (ता. २२) ३०.८५ टक्के पाणीसाठा जमा झाला आहे. मागील वर्षीच्या तुलनेत हा साठा जवळपास १७ टक्क्यांनी कमी असून, मागील वर्षी आजपर्यंत धरणात ४७.८४ टक्के पाणीसाठा शिल्लक होता.

भामा आसखेड हे खेड तालुक्यातील पश्चिम भागात भामा नदीवर उभारलेले मातीचे धरण आहे. धरणाची पाणी साठवण क्षमता ८.१४ टीएमसी इतकी आहे. चालू वर्षी धरण परिसरात १ जूनपासून ३३८ मिमी पावसाची नोंद झाली आहे.

धरणात सध्या एकूण पाणीसाठा हा २.८४ टीएमसी असून उपयुक्त पाणीसाठा हा २.३६ टीएमसी इतका आहे. मागील वर्षी आजच्या तारखेला धरणात ४७.८४ टक्के पाणीसाठा होता. धरणातून पुणे शहराच्या पूर्व भागासह तीर्थक्षेत्र आळंदीला पाणीपुरवठा केला जात आहे.

या धरणातून पुढील काळात पिंपरी-चिंचवड शहराला पाणीपुरवठा सुरू होणार आहे. पिंपरी-चिंचवडसाठी भामा आसखेड धरणातून २.१४ टीएमसी पाणीसाठा देण्यात येणार आहे.

धरणाच्या बुडीत क्षेत्रात आणि पश्चिम भागात पावसाची संततधार सुरू आहे. पर्यटक किंवा नागरिकांनी धोकादायक ठिकाणी जाऊ नये असे आवाहन प्रशासनाच्या वतीने करण्यात आले आहे.