Mumbai News: एसटी महामंडळ दर वर्षी पाच हजार याप्रमाणे पुढील पाच वर्षांत २५ हजार बसेस घेण्यात येणार आहे. यापैकी चालू आर्थिक वर्षापासून पुढील चार वर्षांत २० हजार बस या पर्यावरणपूरक अशा सीएनजी आणि एलएनजीसारख्या इंधनाबरोबरच डिझेल इंधन हायब्रीड करून चालणाऱ्या असतील. डिझेल इंधनाचा वापर केवळ आपत्कालीन परिस्थितीत केला जाणार असल्याने प्रवाशांची गैरसोय होणार नाही, अशी माहिती परिवहनमंत्री प्रताप सरनाईक यांनी शुक्रवारी (ता. ९) दिली.
मंत्री सरनाईक यांनी पर्यावरणपूरक इंधनाच्या संदर्भात एसटी अधिकारी आणि संबंधित इंधन पुरवठादार संस्थांच्या प्रतिनिधींसोबत बैठक घेतली. बैठकीत बोलताना त्यांनी एसटीच्या बहुतेक सर्व बस डिझेल इंधनावर चालणाऱ्या आहेत. महामंडळाच्या एकूण खर्चापैकी सुमारे ३४ टक्के खर्च इंधनावर होतो. महामंडळाला दररोज सुमारे १० लाख ७० हजार लिटर इतके डिझेल लागते. परिणामी, वर्षाला सुमारे ३४ हजार कोटी रुपयांचा खर्च इंधनावर होतो, अशी माहिती त्यांनी दिली.
भविष्यात डिझेल इंधनाची उपलब्धता आणि त्याच्या दरात वारंवार होणारा बदल लक्षात घेता पर्यायी इंधन वापरणे आवश्यक आहे. सीएनजी आणि एलएनजी हे पर्यायी इंधन प्रकार तुलनेने डिझेलपेक्षा स्वस्त असून पर्यावरणपूरक देखील आहेत. शिवाय या इंधनाची कार्यक्षमता चांगली असल्याने बस प्रति लीटर पाच ते साडेपाच किलोमीटर अंतर कापते. सहाजिकच एलएनजी आणि सीएनजी इंधन वापरल्यास इंधनावरील खर्चात बचत होऊन प्रदूषण कमी होण्यास मदत होणार असल्याने पुढील वर्षीपासून खरेदी करण्यात येणाऱ्या नव्या २० हजार बसेस या हायब्रीड इंधनावर चालणाऱ्या असतील, असे मंत्री सरनाईक यांनी सांगितले.
खर्चात २३५ कोटींची बचत
एसटी महामंडळाने यापूर्वी किंग्ज गॅस प्रायव्हेट लिमिटेड या कंपनीबरोबर केलेल्या करारानुसार एलएनजी इंधन हे तत्कालीन डिझेल इंधनाच्या किमतीच्या २० टक्के कमी दराने पुरवठा करण्यात येणार आहे. त्यामुळे सध्याच्या खर्चात दर वर्षी २३५ कोटी रुपयांची बचत होणार आहे, अशी माहितीही मंत्री सरनाईक यांनी दिली.
दरम्यान, राज्यभरात ९० ठिकाणी एलएनजीचे पंप उभारले जाणार आहेत. तसेच महानगर गॅस प्रायव्हेट लिमिटेड कंपनीकडून सीएनजीचे २० पंप उभारण्यात येणार आहेत. त्यामुळे भविष्यात इंधन पुरवठ्याची व्यवस्था होणार असून या दोन्ही इंधनासोबत डिझेल इंधनावर चालेल, अशी हायब्रीड बसेस तयार करण्याचे प्रस्ताव बसनिर्मिती कंपन्यांकडून मागविण्यात आल्याचे प्रताप सरनाईक यांनी या वेळी सांगितले.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
