Wastewater Management : साथरोग रोखण्यासाठी ११६ गावांत होणार सांडपाणी व्यवस्थापन

Nashik News : घराघरांतून बाहेर पडणारे सांडपाणी हे नदी-नाल्यांमार्फत पिण्याच्या पाण्यापर्यंत पोहचते. दूषित पाण्यामुळे साथरोग व इतर आजार उद्‍भवण्याची शक्यता असते. त्यावर उपाययोजना म्हणून जिल्हा परिषदेच्या ग्रामीण पाणीपुरवठा विभागाने जिल्ह्यातील ११६ गावांमध्ये सांडपाणी व्यवस्थापन करण्याचा महत्त्वपूर्ण निर्णय घेतला. या गावांत पाणी शुद्धीकरण प्रकल्प उभारण्यात येणार आहे.

जिल्ह्यात एकूण १,९६१ गावे आहेत. यातील पाच हजारांवर लोकसंख्या असलेल्या गावांमध्ये सांडपाण्याचे व्यवस्थापन करण्याचा निर्णय राज्य सरकारने घेतला आहे. निवडलेल्या गावांमध्ये ‘एसटीपी’ प्रकल्प उभारून नदीनाल्यांमधून वाहणारे रोखण्यासाठी घराघरांतून बाहेर पडणारे दूषित पाणी या प्रकल्पात शुध्द करण्यात येईल.

प्रत्येक गावात होणाऱ्या कामाचे स्वरूप वेगवेगळे असल्यामुळे प्रकल्पाची किंमत भिन्न स्वरूपाची आहे. टाकळी विंचूर (ता. निफाड) येथे ३४ लाख ९३ हजारांची निविदा प्रसिद्ध करण्यात आली. चांदोरी येथे ७५ लाख ५७ हजारांचे प्रकल्प उभा राहील.

नदीकाठच्या गावांना यात प्राधान्य राहणार असले, तरी जिल्ह्यात ११६ गावांमध्ये एकाच वेळी ही कामे होणार असल्याने दूषित पाणी शुद्धीकरण होण्यास निश्‍चितच मदत मिळेल. ग्रामीण पाणीपुरवठा व स्वच्छता विभागामार्फत निविदा प्रक्रिया राबविण्यात येत आहे.

निविदा प्रक्रियेत राज्य शासनाने निर्धारित केलेल्या ३६ कंत्राटदार संस्थांनाच सहभागी होण्याचा अधिकार आहे. त्यांच्यामार्फत ही कामे केली जातील. कामे पूर्ण झाल्यानंतर शेतीची पोत सुधारण्यास निश्‍चितपणे मदत होणार आहे. रसायनयुक्त पाणी शेतीपिकांना दिले जाते. या प्रकल्पांमुळे त्यालाही काहीअंशी आळा बसण्यास मदत होणार आहे.

रसायनयुक्त दूषित पाण्यामुळे जमिनीची पोत खालावतो. हेच पाणी भाजीपाला व इतर पिकांना दिले जात असल्याने त्याचा मानवी शरीरावर विपरीत परिणाम होतो. वेगवेगळ्या प्रकारच्या गंभीर आजारांची लागण होण्याची शक्यता असते. त्यामुळे सांडपाणी व्यवस्थापन प्रकल्प हे यादृष्टीने अत्यंत उपयुक्त ठरतील.