Kolhapur APMC Update: राज्यातील गूळ व्यापाराचे प्रमुख केंद्र म्हणून ओळखल्या जाणाऱ्या कोल्हापूर कृषी उत्पन्न बाजार समितीत सध्या गुळाची आवक घटली आहे. गेल्या महिन्यापर्यंत गजबजणारा गूळ बाजार आता शांत दिसत आहे. आठवड्यातून तीन दिवस गुळाचे सौदे सुरू असून, आवक कमी असल्याने एक ते दोन तासांतच व्यवहार आटोपत आहेत..उसाची उपलब्धता कमी झाल्याने गूळ उत्पादनावर मोठा परिणाम झाला असून, उसाअभावी अनेक गुऱ्हाळे बंद आहेत. गेल्या पंधरवड्यापासून बाजारातील आवक सातत्याने घटत आहे. काही महिन्यांपूर्वी गाड्यांनी गजबजलेल्या बाजारात आता दररोज अवघ्या आठ ते दहा गाड्यांचीच आवक होत आहे. सध्या एक किलोपासून ते तीस किलोपर्यंतच्या गुळाच्या केवळ दहा हजार रव्यांची आवक होत आहे..Jaggery Rate: नीरा बाजार समितीत गुळाला ४५२५ रुपये दर.यंदाच्या हंगामात ऊस उत्पादन अपेक्षेपेक्षा कमी राहिल्याने त्याचा थेट परिणाम गूळ उद्योगावर झाला आहे. कोल्हापूर जिल्ह्यासह सीमाभागातील कर्नाटकातही गूळनिर्मिती घटली आहे. परिणामी, बाजारात नवीन गुळाचा पुरवठा कमी झाला आहे. मागणी फारशी वाढलेली नसली, तरी उपलब्ध गुळाला नियमित मागणी आहे. त्यामुळे मध्यंतरी घसरलेले गुळाचे दर आता पुन्हा वाढू लागले आहेत. सध्या बाजारात गुळाला प्रति क्विंटल ४१०० ते ४५०० रुपये दर मिळत असून, आगामी पावसाळ्यात हे दर आणखी वाढण्याची शक्यता व्यापाऱ्यांकडून व्यक्त केली जात आहे..विशेष म्हणजे गुजरातसारख्या मोठ्या ग्राहक राज्यातही गुळाचा साठा वेगाने कमी होत आहे. व्यापारी वर्तुळातून मिळालेल्या माहितीनुसार, गुजरातमधील शीतगृहांमध्ये साठवलेला गूळ आता पन्नास टक्क्यांपेक्षाही कमी उरला आहे. सध्या अधिक महिना सुरू असल्याने विवाह समारंभ, धार्मिक कार्यक्रम आणि इतर सामाजिक उपक्रमांचे प्रमाण कमी आहे. त्यामुळे गुळाच्या मागणीत अपेक्षित वाढ दिसून येत नाही. सध्या केवळ नियमित गरजेपुरतीच मागणी आहे..Jaggery Market: भारतीय गुळाची गोडी पोहोचली सातासमुद्रापार.पूर्वी पावसाळ्यापूर्वी व्यापारी मोठ्या प्रमाणात गूळ खरेदी करून शीतगृहात साठवत असत. पावसाळ्यात उत्पादन थांबत असल्याने या साठ्यावरच बाजार अवलंबून राहायचा. मात्र अलीकडच्या काळात बारमाही गूळ उपलब्ध होऊ लागल्याने शीतगृहासाठी खरेदीचे प्रमाण कमी झाले आहे. त्यामुळे यंदा बाजारात दीर्घकालीन साठा फारसा तयार झालेला नाही. परिणामी, पावसाळ्यात पुरवठा विस्कळीत झाल्यास गुळाचा तुटवडा निर्माण होण्याची शक्यता अधिक बळावली आहे. गूळ व्यापाऱ्यांच्या मते, सध्याची परिस्थिती ही केवळ हंगामी चढ-उतार नसून उत्पादन घट, उसाची कमतरता आणि बदलती बाजारपेठ यांचा एकत्रित परिणाम आहे..अधिक महिना संपल्यानंतर मागणीत वाढ शक्यसूत्रांनी दिलेल्या माहितीनुसार, ‘‘मागणीत झालेली घट ही तात्पुरती परिस्थिती आहे. अधिक महिना संपल्यानंतर पुन्हा कार्यक्रमांना सुरुवात होईल. त्यानंतर गुळाच्या मागणीत अचानक वाढ होण्याची शक्यता आहे. त्या वेळी बाजारात पुरेसा साठा उपलब्ध नसल्यास गुळाचे दर आणखी झपाट्याने वाढू शकतात.’’.ॲग्रोवनचे सदस्य व्हाशॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
