Weather report : राज्यात मागील तीन ते चार दिवसांपासून थंडी कमी झाली. तर काही भागात ढगाळ वातावरण होते. मात्र उद्या राज्यातील काही भागात पावसाचा अंदाज आहे.

हवामान विभागाने उद्या म्हणजेच गुरुवारी काही ठिकाणी पावसाचा अंदाज दिला. कोकणातील सिंधुदूर्ग आणि मध्य महाराष्ट्रातील सांगली आणि कोल्हापूर जिल्ह्यात काही ठिकाणी विजा आणि ढगांच्या गडगडाटासह हलक्या ते मध्यम पावसाचा अंदाज हवामान विभागाने दिला. यावेळी ३० ते ४० किलोमीटर प्रतितास वेगाने वारेही वाहण्याची शक्यता असल्याचे हवामान विभागाने म्हटले आहे.

गुरुवारी मध्य महाराष्ट्रातील सातारा, मराठवड्यातील धाराशिव आणि लातूर जिल्ह्यातही काही ठिकाणी विजांसह हलक्या पावसाचा अंदाज आहे. तर काही जिल्ह्यांमध्ये ढगाळ वातावरण राहील, असाही अंदाज हवामान विभागाने दिला. तर शुक्रवारपासून पावसाचे प्रमाण आणि जोर काहीसा वाढू शकतो. शुक्रवारपासून सोमवारपर्यंत राज्याच्या विविध भागात पाऊस हजेरी लावू शकतो, असाही अंदाज हवामान विभागाने दिला.