Pune News: उत्तर भारतात थंडीमध्ये काहीसे चढ उतार होत असले तरी थंडीचा कडाका जाणवत आहे. राज्यात मात्र उत्तर भारतातून थंड वाऱ्यांचे प्रवाह खंडीत झाल्याने आणि ढगाळ वाहमान यामुळे राज्यात थंडीचा कडाका कमी जाणवत आहे. राज्यातील थंडीचे प्रमाण काहीसे कमीच राहील, असा अंदाज हवामान विभागाने दिला.

राज्यात जानेवारीपासूनच थंडीचे प्रमाण सरासरीपेक्षा कमीच राहीले आहे. कमाल आणि किमान तापमानात वाढ झाल्याने ऐन थंडीत उन्हाच्या झळा अनुभवायला मिळत आहेत. राज्यातील काही ठिकाणी कमाल तापमान ३५ अंशावर आहेत. जेऊर आणि उदगीर येथे आज ३५ अंशाची नोंद झाली. तर सोलापूर येथे ३६ अंशावर तापमान पोचले होते.

तर किमान तापमान आजही सरासरीपेक्षा जास्तच होते. आज निफाय येथील गहू संशोधन केंद्रात १२.६ अंशाची नोंद झाली होती. तर इतर ठिकाणी तापमान १३ अंशाच्याही पुढे होते. त्यामुळे राज्यात थंडीचा कडाका कमी आणि उष्णता अधिक, अशी परिस्थिती दिसत आहे.

उत्तर भारतातही थंडीमध्ये चढ उतार सुरुच आहेत. पण थंडी कायम आहे. आज राजस्थानमधील गंगानगर येथे देशाच्या सपाट भूभागावरील नीचांकी ४ अंश सेल्सिअस तापमानाची नोंद झाली. पूर्व राजस्थानात समुद्र सपाटीपासून १.५ किलोमीटर उंचीवर चक्राकार वाऱ्यांची स्थिती आहे. वायव्य भारतात १२.६ किलोमीटर उंचीपर्यंत १३० नॉट्स वेगाने पश्चिमेकडील जोरदार वाऱ्यांचे प्रवाह कायम आहेत.