Pune News : राज्यातील थंडी कमीच असून वातावरणात काहीशी वाढ झालेली आहे. ढगाळ हवामानामुळे राज्यातील किमान तापमानात वाढ झाली. राज्यातील अनेक भागात ढगाळ हवामान दिसत आहे.

दुपारी काहीसा उकाडाही जाणवत आहे. उत्तर महाराष्ट्रात तुरळक ठिकाणी किरकोळ स्वरुपाचा पाऊस झाला. राज्यातील तापमानात चढ उतार कायम राहतील, असा अंदाज हवामान विभागाने दिला. 

उत्तर भारतात थंडीचा कडाका कायम आहे. अनेक भागात मागील २४ तासांमध्ये थंडी वाढली होती. तर अनेक ठिकाणी दाट धुक्याची चादर सकाळी पाहायला मिळत आहे. उत्तरेतील बहुतांशी भागात थंड टिकून आहे.

आज पंजाबमधील पठाणकोट येथे देशाच्या सपाट भूभागावरील नीचांकी २.८ अंश सेल्सिअस तापमानाची नोंद झाली. आग्नेय अरबी समुद्रामध्ये केरळच्या किनाऱ्यालगत चक्राकार वाऱ्यांची स्थिती तयार झाली आहे. उत्तर भारतात १४० नॉट्स वेगाने पश्चिमेकडील जोरदार वाऱ्यांचे झोत वाहत आहेत. 

राज्यात किमान तापमानात झालेली वाढ कायम आहे. अनेक भागात ढगाळ हवामान आहे. त्याचा परिणाम थंडीवर झाला. थंडीचा कडाका बहुतांशी ठिकाणी कमी आहे. दुपारी कडक उन्हामुळे काहीसा उकाडाही जाणवत आहे. आजही हवामान विभागाने उत्तर महाराष्ट्रातील काही ठिकाणी अगदी किरकोळ पावसाचा अंदाज व्यक्त केला. तर राज्यातील तापमानात चढ उतार कायम राहतील, असाही अंदाज हवामान विभागाने दिला.