Pune News : ला निना परिस्थिती निर्माण होणार याची चर्चा मागील काही महिन्यांपासून जोर धरत आहे. आता अपेक हवामान केंद्राने डिसेंबर ते फेब्रुवारी या काळात ला निना निर्माण होण्याची ६२ टक्के शक्यता असल्याचे म्हटले आहे. 

अपेक हवामान केंद्राने म्हटले आहे की, एपीसीसी एन्सो स्थिती ला निनाची शक्यता दर्शवित आहे. निनो ३.४ इंडेक्स जानेवारी २०२५ मध्ये उणे ०.८ सेल्सिअस राहण्याची अपेक्षा आहे. ही स्थिती वाढत जाऊन मे २०२५ पर्यंत उणे ०.३ सेल्सिअस होण्याची शक्यता आहे. 

ऑस्ट्रेलियाच्या हवामान विभागाच्या मते, इंडेक्स उणे ०.८ सेल्सिअसपर्यंत खाली येईल तेव्हा स्थिती ला निना पातळीवर येईल. ऑस्ट्रेलियन ब्युरो ऑफ मेटेराॅलाॅजीच्या अंदाजानुसार ला निना स्थिती फेब्रुवारी २०२५ च्या आधीच निर्माण होण्याची शक्यता आहे. 

अमेरिकेच्या क्लायमेट प्रेडिक्शन सेंटरनेही ला निनाविषयी अंदाज दिला आहे. क्लायमेट प्रेडिक्शन सेंटरच्या मते, ऑक्टोबर ते डिसेंबर दरम्यान ला निना निर्माण होण्याची शक्यता ५७ टक्के आहे. तर जानेवारी ते मार्च २०२५ च्या दरम्यान ही स्थिती कायम राहू शकते. 

एपीसीसीने डिसेंबरमध्ये भारतात सरासरीपेक्षा जास्त पावसाचा अंदाज दिला आहे. पूर्व हिंद महासागरात सरासरीपेक्षा कमी पावसाची शक्यता असतानाही हा अंदाज देण्यात आला आहे. तसेच जगातील बहुतेक भागात डिसेंबर २०२४ ते मे २०२५ या काळात तापमान सरासरीपेक्षा जास्त राहण्याची शक्यता आहे.