Parbhani News : भारतीय हवामान विभागाने (Weather Department) आज (ता. १६ ) पर्यंत मराठवाड्यातील परभणी, हिंगोली यासह काही जिल्ह्यामध्ये वादळी वाऱ्यासह विजांच्या कडकडाटात पावसाचा इशारा दिला आहे.

कोसळणाऱ्या विजेपासून नागरिकांनी स्वत:चा बचाव करण्यासाठी खबरदारी घ्यावी, असे आवाहन जिल्हा प्रशासनातर्फे करण्यात आले आहे.

विजांचा कडकडाट होत असताना शेतकऱ्यांनी, नागरीकांनी तत्काळ घरात किंवा सुरक्षित ठिकाणी आसरा घ्यावा. पोहणारे, मच्छीमारी करणाऱ्यांनी तत्काळ पाण्यातून बाहेर यावे.

जवळ आसरा नसेल तर पायाखाली लाकूड, प्लॅस्टिक, गोणपाट अशा वस्तू अथवा कोरडा पालापाचोळा ठेवा. विजेपासून बचावासाठी दोन्ही पाय एकत्र करून गुडघ्यावर दोन्ही हात ठेवून डोके जमिनीकडे गुडघ्यामध्ये झुकवा व डोके जमिनीवर टेकणार नाही याची काळजी घ्यावा.

झाडाच्या उंचीपेक्षा दुप्पट अंतरावर उभे राहावे. वीजवाहक वस्तूंपासून दूर राहावे, विजेचे खांब, टेलिफोन खांब, लोखंडी पाइप यापासून दूर राहावे. वीज पडल्यास प्राथमिक उपचारासाठी मुख्यतः हृदय व श्वसन प्रकियेत अडथळा येतो.

त्यामुळे विद्युतघात झाल्यास लगेच हृदयाच्या बाजूने मालिश करावी. तोंडाने श्वसन प्रक्रियेस मदत करावी. विजा चमकत असल्यास संगणक, विद्युत उपकरणे बंद करून ठेवावीत.

वादळी वाऱ्यासह, पावसाची शक्यता देखील असल्याने शेतकऱ्यांनी तसेच नागरिकांनी यानुसार आपापल्या कामाचे नियोजन करावे. पाण्याचे नळ, फ्रिज, टेलिफोन यांना स्पर्श करू नका.

बाहेर असाल तर भ्रमणध्वनी तत्काळ बंद करावा. विजेच्या खांबाजवळ उभे राहू नये. झाडाखाली आश्रय घेऊ नये. दोन चाकी, सायकल यावर असाल तर तत्काळ उतरून सुरक्षित ठिकाणी जावे. धातूची कांडी असलेल्या छत्रीचा वापर करू नये, असे आवाहन करण्यात आले आहे.