Pune News : पावसाला पोषक हवामान झाल्याने राज्याच्या विविध भागात ढगाळ हवामान होत आहे. ढगाळ हवामानामुळे राज्याच्या कमाल तापमानात काहीशी घट झाल्याचे दिसून आले आहे. आज (ता. ९) विदर्भ आणि मराठवाड्यात वादळी वाऱ्यासह पावसाचा इशारा हवामान विभागाने दिला आहे. मध्य महाराष्ट्रातही विजांसह पावसाची शक्यता आहे.

मराठवाडा आणि परिसरावर समुद्र सपाटीपासून १.५ किलोमीटर उंचीवर चक्राकार वाऱ्याची स्थिती आहे. तर आंध्र प्रदेशच्या उत्तर किनारपट्टीपासून रायलसीमा ते दक्षिण तमिळनाडूपर्यंत हवेचा कमी दाबाचा पट्टा सक्रिय आहे.

विदर्भासह राज्यात ढगाळ आकाश होत आहे. विदर्भात कमाल तापमान चाळिशीच्या खाली आले आहे. मराठवाडा, मध्य महाराष्ट्रात तुरळक ठिकाणी कमाल तापमान चाळिशीपार आहे. सोमवारी (ता. ८) सकाळपर्यंतच्या २४ तासांमध्ये सोलापूर राज्यातील उच्चांकी ४२.२ अंश सेल्सिअस तापमान नोंदले गेले.

वादळी पावसाला पोषक हवामान असल्याने आज (ता. ९) विदर्भ, मराठवाड्यात वादळी वारे, विजांसह पावसाचा इशारा (येलो अलर्ट) देण्यात आला आहे. मध्य महाराष्ट्रात तुरळक ठिकाणी विजांसह पावसाचा अंदाज आहे. तर उर्वरित राज्यात ढगाळ हवामानासह उन्हाचा चटका कमी-अधिक होण्याची शक्यता आहे.

सोमवारी (ता. ८) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअस मध्ये) :

पुणे ३८.५, धुळे ४०.०, जळगाव ३९.४, कोल्हापूर ३८.६, महाबळेश्वर ३२.६, मालेगाव ४१.२, नाशिक ३६.४, निफाड ३६.०, सातारा ३८.८, सोलापूर ४२.२, सांताक्रूझ ३६.६, डहाणू ३३.६, रत्नागिरी ३३.९,

छत्रपती संभाजीनगर ३७.४, बीड ४०.४, नांदेड ४०.२, धाराशिव ४०.०, परभणी ३९.४, अकोला ३९.२, अमरावती ३६.२, बुलडाणा ३६.६, ब्रह्मपुरी ३९.८, चंद्रपूर ३९.८, गडचिरोली ३७.४, गोंदिया ३१.६, नागपूर ३२.५, वर्धा ३४.८, वाशीम ३९.६, यवतमाळ ३८.०.

वादळी पावसाचा इशारा (येलो अलर्ट) :

धाराशिव, लातूर, परभणी, हिंगोली, नांदेड, बुलडाणा, अकोला, अमरावती, वाशीम, यवतमाळ, वर्धा, नागपूर, चंद्रपूर, भंडारा, गोंदिया, गडचिरोली.

४० अंशांपेक्षा अधिक कमाल तापमान असलेली ठिकाणे :

सोलापूर ४२.२, मालेगाव ४१.२, बीड ४०.४, नांदेड ४०.२, धुळे ४०, धाराशिव ४०.