Pune News: उत्तर भारतातील काही भागात थंडी कमी जास्त होत आहे. तर राज्यातील तापमानात चढ उतार सुरुच आहेत. राज्यात आजही थंडी कमीच होती. तर दुपारी उन्हाचा चटकाही अनेक भागात जाणवत आहे.  राज्यातील तापमानातील चढ उतार कायम राहतील, असा अंदाज हवामान विभागाने दिला. 

उत्तर भारतात थंडी कमी जास्त होत आहे. उत्तर भारतातील काही भागात आजही थंडी वाढली होती. तर काही भागात थंडी कमीच होती. उत्तर भारतातील अनेक भागात धुक्याची चादरही पाहायला मिळत आहे.

आज राजस्थानातील फतेहपूर येथे देशाच्या सपाट भूभागावरील नीचांकी १ अंश सेल्सिअस तापमानाची नोंद झाली.  एकामागोमाग येणाऱ्या पश्चिमी चक्रवातांबरोबरच वायव्य भारतात १२.६ किलोमीटर उंचीपर्यंत १४५ नॉट्स वेगाने पश्चिमेकडील जोरदार वाऱ्यांचे प्रवाह कायम आहेत.

राज्यात सध्या सकाळी गारठा आणि धुके तसेच दुपारी उन्हाचा चटका अशी परिस्थिती जाणवत आहे. त्यामुळे दुपारच्या वेळी उकाडाही जाणवत आहे. आज निफाड येथील गहू संशोधन केंद्रात १२.२ अंश सेल्सिअस तापमानाची नोंद झाली होती.

राज्यात तापमानात वाढलेलेच आहे. आजपासून राज्यात आकाश अंशतः ढगाळ होण्याची व किमान तापमानात वाढ होण्याची शक्यता हवामान विभागाने वर्तविला आहे.