Maharashtra Climate : राज्यात कमाल तापमानात पुन्हा वाढ होऊ लागल्याने उन्हाच्या झळा वाढू लागल्या आहे. किमान तापमानाचा पारा वाढू लागल्याने गारठा कमी अधिक होत आहे. आज (ता. ७) राज्याच्या कमाल आणि किमान तापमानात वाढ होण्याची शक्यता हवामान विभागाने वर्तविली आहे.

अवकाळी पाऊस आणि गारपिटीच्या तडाख्यानंतर राज्याच्या किमान तापमानात अचानक घट झाल्याने निफाड येथे पारा ७ अंशांच्या खाली घसरला होता. दुपारच्या वेळी उन्हाचा चटका, उकाडा कायम असल्याचे चित्र आहे.

बुधवारी (ता. ६) किमान तापमानात वाढ होत पारा पुन्हा वर सरकला आहे. निफाड येथील गहू संशोधन केंद्रात ९.८ अंश तापमानाची नोंद झाली. बुधवारी (ता. ६) सकाळपर्यंतच्या २४ तासांत सोलापूर येथे राज्यातील उच्चांकी ३८.२ अंश सेल्सिअस तापमान नोंदले गेले. अनेक ठिकाणी कमाल तापमान ३५ अंशांच्या पार आहे.

पूर्व विदर्भापासून कर्नाटक ते दक्षिण तमिळनाडूपर्यंत हवेचा कमी दाबाचा पट्टा तयार झाला आहे. विदर्भ, मराठवाड्यात अंशतः ढगाळ हवामान असून, आज (ता.७) तापमानातील वाढ कायम राहण्याची शक्यता हवामान विभागाने वर्तविली आहे.

बुधवारी (ता. ६) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअसमध्ये) :
पुणे ३५.८ (१४.४), धुळे ३४ (११), जळगाव ३५.२ (१२.८), कोल्हापूर ३४.६ (१९.७), महाबळेश्वर ३० (१६.४), मालेगाव ३२.४ (३२.४), नाशिक ३४.५ (१२.६), निफाड ३३ (९.८), सांगली ३५.९ (२०.१), सातारा ३५.३ (१७), सोलापूर ३८.२ (२१.८), सांताक्रूझ ३३.३ (१७.८), डहाणू ३२.१ (१५.५), रत्नागिरी ३४ (१८.३), छत्रपती संभाजीनगर ३४ (१६.६), नांदेड ३५.८ (२०.४), परभणी ३६.१ (१९.५), अकोला ३६.३ (१८), अमरावती ३४.८ (१९.८), बुलडाणा ३४.४ (१७.४), ब्रह्मपुरी ३६.६ (१९.८) चंद्रपूर ३६.६ (१९.८), गडचिरोली ३३.४ (१८), गोंदिया ३३.२ (१८.२), नागपूर ३४.२ (१८.८), वर्धा ३५.९ (२१), वाशीम ३७.४ (१६.८), यवतमाळ ३७ (२०).