Pune News : राज्यात पावसाचे वातावरण दूर झाले. त्यामुळे तापमानात चढ उतार दिसून येत आहेत. गेल्या आठवडाभरात ढगाळ वातावरण आणि पावसामुळे थंडी गायब झाली होती. उत्तर भारतातील राज्यांमध्येही बहुतांशी ठिकाणी थंडी कमी झाली. राज्यात पुढील काही दिवसांमध्ये पुन्हा थंडीला सुरुवात होईल, असा अंदाज हवामान विभागाने दिला.

राजस्थान आणि परिसरावर चक्राकार वाऱ्यांची स्थिती आहे. या परिसरापासून उत्तर गुजरातपर्यंत हवेचा कमी दाबाचा पट्ट्याचीही निर्मिती झाली. पूर्वेकडील वाऱ्यांच्या प्रभावामुळे आग्नेय अरबी समुद्रापासून दक्षिण महाराष्ट्रापर्यंत हवेचा कमी दाबाचा पट्टा सक्रिय आहे. यामुळे सध्या उत्तर भारतातील राज्यांमध्ये थंडी कमी झालेली आहे.

राज्यात मागील आठवडाभरात राज्यात ढगाळ हवामानासह पावसानेदेखील हजेरी लावली. मागील तीन दिवसांमध्ये राज्याच्या काही भागात गारपीटही झाली होती. तर पावसाने देखील पिकांना तडाखा दिला होता.

त्यामुळे राज्यातील थंडी गायब झाली आहे. उत्तर भारतातूनही थंडी वाऱ्यांचा प्रवाह काहीसा खंडीत झाला होता. राज्यात आजही तापमानात चढ उतार राहील, असा अंदाज हवामान विभागाने दिला. तसेच पुढील काही दिवसांत पुन्हा थंडीला सुरुवात होऊ शकते, असाही अंदाज हवामान विभागाने दिला.