Pune News : उत्तरेकडील थंड वाऱ्यांच्या प्रवाहामुळे राज्यात गारठा वाढला आहे. किमान तापमान हंगामात प्रथमच १० अंशांखाली घसरल्याने परभणी, धुळे आणि निफाड येथे हुडहुडी वाढली आहे. आज (ता. २६) किमान तापमानात घट होण्याची शक्यता आहे. उत्तरेकडील जिल्ह्यांमध्ये हुडहुडी वाढत जाण्याच अंदाज हवामान विभागाने वर्तविला आहे.

देशाच्या उत्तरेकडे थंडीचा कडाका वाढू लागला आहे. सोमवारी (ता. २५) उत्तर प्रदेशातील 'सारसवा' येथे देशाच्या सपाट भूभागावरील नीचांकी १०.२ अंश सेल्सिअस तापमानाची नोंद झाल्याचे हवामान विभागाने म्हटले आहे.

दरम्यान परभणी येथील वसंतराव नाईक कृषी विद्यापीठामध्ये राज्याचे यंदाच्या हंगामातील ९.६ अंश तापमानाची नोंद झाली आहे. धुळे येथील कृषी महाविद्यालय आणि निफाड येथील गहू संशोधन केंद्रात १० अंश तापमानाची नोंद झाली. अनेक ठिकाणी किमान तापमान १३ अंशांपेक्षा खाली आहे. उर्वरीत राज्यात किमान तापमानाचा पारा घसरू लागला आहे.

महाराष्ट्रात अनेक ठिकाणी कमाल तापमानाचा पारा ३० अंशाच्या खाली आला आहे. कोकण आणि विदर्भात ३० अंशाच्या वर असला तरी कमाल तापमानात घट होत आहे. सोमवारी (ता. २४) सकाळपर्यंतच्या २४ तासांमध्ये सांताक्रूझ येथे उच्चांकी ३४.१ अंश तापमानाची नोंद झाली. आज (ता. २६) किमान तापमानात घट होत गारठा वाढण्याची शक्यता हवामान विभागाने वर्तविली आहे.

सोमवारी (ता. २५) सकाळी ८.३० वाजेपर्यंतच्या २४ तासांमध्ये राज्यात विविध ठिकाणी नोंदले गेलेले कमाल तापमान, कंसात किमान तापमान (अंश सेल्सिअस मध्ये) :

पुणे २९.१ (१२.१), अहिल्यानगर २९.० (-), धुळे - (१०.०), जळगाव ३०.० (१२.४), कोल्हापूर २८.६ (१६.७), महाबळेश्वर २४.१ (१२.०), मालेगाव २६.८ (१३.६), नाशिक २८.९ (१२.०), निफाड २७.९ (१०.०), सांगली ३०.० (१५.७), सातारा २९.९ (१३.८), सोलापूर ३२.२ (१५.६), सांताक्रूझ ३४.१ (१९.०), डहाणू ३३.६ (१८.७), रत्नागिरी ३३.४ (२१.१),

छत्रपती संभाजीनगर २९.० (१२.५), धाराशिव - (१५.४), परभणी २८.५(१२.७), परभणी कृषी विद्यापीठ २८.० (९.६), अकोला ३०.६ (१४.०), अमरावती ३१.० (१५.५), बुलढाणा २८.६ (१४.३), ब्रह्मपूरी ३१.२ (१३.१), चंद्रपूर २८.४ (१४.८), गडचिरोली २९.० (१३.४), गोंदिया २८.४ (१२.५), नागपूर ३०.२ (१३.०), वर्धा २९.० (१३.८), वाशीम २९.० (-), यवतमाळ ३०.० (-).

१० अंश व त्यापेक्षा कमी तापमान असलेली ठिकाणे :

परभणी (कृषी) ९.६, धुळे १०, निफाड १०.