Pune News : राज्यात यंदाच्या हंगामात पहिल्यांदाच तापमानाने ४५ अंशाचा टप्पा पार केला. विदर्भात उष्णतेच्या लाटेचा इशारा कायम आहे. तर मराठवाडा आणि मध्य महाराष्ट्रात उष्ण तसेच दमट हवामानाचा अंदाज आहे.

विदर्भातील चंद्रपूर येथे राज्यातील सर्वाधिक ४५.६ अंश सेल्सिअस तापमानाची नोंद झाली होती. तर ब्रम्हपुरी येथेही ४५ अंश सेल्सिअस तापमान होते. विदर्भातील इतर भागातही ४३ ते ४४ अंशाच्या दरम्यान तापमान होते. अकोला जिल्ह्यातील काही ठिकाणी आजपासून पुढील ५ दिवस उष्णतेच्या लाटेचा अंदाज आहे.

अमरावती जिल्ह्यात आजपासून तीन दिवस उष्णतेची लाट राहील, असेही हवामान विभागाने म्हटले आहे. चंद्रपूर जिल्ह्यात आजपासून ४ दिवस तर नागपूर जिल्ह्यात उद्यापासून तीन दिवस आणि वर्धा जिल्ह्यात गुरुवारी आणि शुक्रवारी उष्णतेची लाट राहील, असा अंदाज हवामान विभागाने दिला.

मराठवाड्यातही तापमान जास्तच राहील, असाही अंदाज हवामान विभागाने दिला. नांदेड, लातूर आणि धाराशिव जिल्ह्यात काही ठिकाणी आजपासून पुढील ४ दिवस उष्ण आणि दमट हवामानाचा अंदाज आहे. परभणी, बीड आणि हिंगोली जिल्ह्यात उद्यापासून तीन दिवस तर जालना जिल्ह्यात गुरुवारी आणि शुक्रवारी उष्ण तसेच दमट हवामानाचा इशारा देण्यात आला.

सोलापूर जिल्ह्यात आज आणि शनिवारी पावसाचा अंदाज देण्यात आला. तर बुधवार, गुरुवार आणि शुक्रवारी उष्ण आणि दमट हवामान राहील. कोकणातील पालघर, ठाणे, मुंबई आणि रायगड जिल्ह्यात आज उष्ण आणि दमट हवामानाचा अंदाज हवामान विभागाने दिला.