Pune News : राज्यात मॉन्सूनचा पाऊस सक्रिय होऊ लागला आहे. आज (ता. १६) कोकण, घाटमाथ्यावर पावसाचा जोर कायम राहण्याची शक्यता आहे. पूर्व विदर्भात पाऊस वाढणार असून, मध्य महाराष्ट्र आणि मराठवाड्यात पावसाचा जोर कमी होण्याची शक्यता आहे. रायगड जिल्ह्यात मुसळधारेची शक्यता असल्याने सावधगिरीचा इशारा (रेड अलर्ट), कोकण आणि घाटमाथ्यावर जोरदार पावसाचा इशारा (ऑरेंज अलर्ट) हवामान विभागाने दिला आहे.

‎दक्षिण मध्य महाराष्ट्र आणि परिसरावर समुद्र सपाटीपासून ७.६ किलोमीटर उंचीवर चक्राकार वाऱ्यांची स्थिती आहे. बंगालच्या उपसागरातही समुद्र सपाटीपासून ३.१ ते ७.६ किलोमीटर उंचीवर चक्राकार वारे वाहत आहेत.

रविवारी (ता. १५) सकाळपर्यंतच्या २४ तासांमध्ये विदर्भातील वर्धा येथे राज्यातील उच्चांकी ४०.४ अंश, तर अमरावती येथे ४० अंश तापमानाची नोंद झाली. कोकण, घाटमाथ्यावर मध्यम ते जोरदार पाऊस पडला. रत्नागिरी जिल्ह्यातील राजापूर येथे उच्चांकी २५० मिलिमीटर, सिंधुदुर्गातील कणकवली येथे १०० मिलिमीटर पावसाची नोंद झाल्याचे हवामान विभागातर्फे सांगण्यात आले.

आज (ता. १६) रायगड जिल्ह्यात मुसळधार पावसाचा शक्यता असल्याने सावधगिरीचा इशारा (रेड अलर्ट) देण्यात आला आहे. तर रत्नागिरी, सिंधुदुर्ग, पुणे घाटमाथा, सातारा घाटमाथा, कोल्हापूरच्या घाटमाथ्यावर जोरदार पावसाची शक्यता असल्याने दक्षतेचा इशारा (ऑरेंज अलर्ट) आहे. मुंबई, पालघर, ठाणे, नाशिक घाटमाथा, नागपूर, भंडारा, गोंदिया, गडचिरोली या जिल्ह्यांत जोरदार पावसाची, उर्वरित विदर्भात विजांसह वादळी पावसाची शक्यता असल्याने सतर्कतेचा इशारा (येलो अलर्ट) देण्यात आला आहे.

रविवारी (ता. १५) सकाळपर्यंतच्या २४ तासांमध्ये राज्यात पडलेला पाऊस, मिलिमीटरमध्ये. (सौजन्य : हवामान विभाग)

कोकण :

राजापूर २५०, कणकवली १००, देवगड, लांजा प्रत्येकी ९०, रामेश्‍वर ८०, सावंतवाडी, वाकवली, माणगाव प्रत्येकी ६०, म्हसळा, रत्नागिरी, वैभववाडी प्रत्येकी ५०, मालवण, संगमेश्‍वर, सावर्डे, दोडामार्ग, खेड, मंडणगड, श्रीवर्धन प्रत्येकी ४०.

मध्य महाराष्ट्र :

पुणे शहर, चिंचवड प्रत्येकी ६०, राजगुरुनगर ५०, तळेगाव, वडगाव, घोडेगाव प्रत्येकी ४०, दौंड, सातारा, गगनबावडा, पौड, तळोदा, आजरा प्रत्येकी ३०.

मराठवाडा :

सोयगाव ५०, वैजापूर ४०, कन्नड, पैठण, धाराशिव प्रत्येकी ३०, फुलंब्री, भूम प्रत्येकी २०.

विदर्भ, गुजरातमध्ये मॉन्सूनची प्रगती शक्य

महाराष्ट्रात यंदा वेगाने दाखल होणाऱ्या मॉन्सूनची वाटचाल तब्बल २० दिवस थांबली आहे. २६ मेपर्यंत महाराष्ट्रातील मुंबई, अहिल्यानगर, बीड, परभणी, हिंगोली, नांदेड, यवतमाळ, चंद्रपूर आणि गडचिरोली जिल्ह्यांच्या काही भागांत दाखल झाल्यानंतर मॉन्सूनची प्रगती झालेली नाही.

वाटचालीस पोषक हवामान होत असल्याने आज (ता. १६) विदर्भ, गुजरात, छत्तीसगड आणि ओडिशामध्ये मॉन्सूनची प्रगती होण्याची शक्यता हवामान विभागाने वर्तविली आहे. तर पुढील दोन दिवसांत पश्‍चिम बंगाल, झारखंड, बिहार, पूर्व उत्तर प्रदेशात मॉन्सूनची प्रगती होण्याची शक्यता आहे.

रविवारी (ता. १५) सकाळी ८.३० वाजेपर्यंतच्या २४ तासांमध्ये नोंदले गेलेले तापमान. (अंश सेल्सिअसमध्ये)

‎ठिकाणे---तापमान कमाल---तापमान किमान

‎पुणे---३२.४---२४.७

अहिल्यानगर---३१.२---२३.७

‎‎धुळे---३६.०---२१.५

जळगाव---३८.५---२३.४

जेऊर---३२.०---२१.५

‎‎कोल्हापूर---२८.६---२२.६

‎महाबळेश्‍वर---२३.६---१९.४

मालेगाव---३५.६---२३.६

‎‎नाशिक---३३.४---२३.३

‎निफाड---३३.०---२१.८

‎सांगली---२९.७---२३.३

‎सातारा---२९.३---२३.५

‎सोलापूर---३३.३---२५.०

‎सांताक्रूझ---३३.५---२६.४

डहाणू---३४.०---२६.५

‎रत्नागिरी---२७.०---२४.७

छत्रपती संभाजीनगर---३३.३---२४.१

‎धाराशिव---३४.१---२२.१

‎परभणी---३५.६---२५.६

परभणी (कृषी)---३५.२---२४.५

‎‎अकोला---३९.१---२६.७

अमरावती---४०.०---२२.१

‎भंडारा---३९.२---२७.०‎‎

बुलडाणा---३५.०---२३.६

‎ब्रह्मपुरी---३९.८---२७.९

‎चंद्रपूर---३६.२---२६.६

‎गडचिरोली---३६.०---२६.२

‎गोंदिया---३८.९---२६.८

‎नागपूर---३९.४---२७.८

‎वर्धा---४०.४---२७.९

‎वाशीम---३३.०---२५.२

‎यवतमाळ---३८.०---२५.४

मुसळधार पावसाचा इशारा (रेड अलर्ट) :

रायगड.

जोरदार पावसाचा इशारा (ऑरेंज अलर्ट) :

रत्नागिरी, सिंधुदुर्ग, पुणे घाटमाथा, सातारा घाटमाथा, कोल्हापूर घाटमाथा,

जोरदार पावसाचा इशारा (येलो अलर्ट) :

मुंबई, पालघर, ठाणे, नाशिक घाटमाथा, नागपूर, भंडारा, गोंदिया, गडचिरोली.

विजांसह वादळी पावसाची शक्यता (येलो अलर्ट) :

बुलडाणा, अकोला, अमरावती, वाशीम, यवतमाळ, वर्धा, नागपूर, भंडारा, गोंदिया, चंद्रपूर, गडचिरोली.