Weather Update Pune : बंगालच्या उपसागरातील कमी दाब क्षेत्र पोषक ठरल्याने राज्यात पाऊस पुन्हा सुरू होण्याची शक्यता आहे. आज (ता. २) कोकण, घाटमाथा, पूर्व विदर्भात तुरळक ठिकाणी जोरदार पावसाचा इशारा आहे.

रायगड, रत्नागिरीसह पुणे, सातारा जिल्ह्याच्या घाटमाथ्यावर जोरदार पावसाचा 'ऑरेंज अलर्ट' देण्यात आला आहे. तर खानदेश, मराठवाडा आणि विदर्भात तुरळक ठिकाणी विजांसह पावसाची शक्यता हवामान विभागाने वर्तविली आहे.

बंगालच्या उपसागरात तयार झालेल्या कमी दाब क्षेत्राची तीव्रता वाढून, पश्चिम बंगाल आणि बांग्लादेशच्या किनाऱ्यालगत वादळी प्रणालीची निर्मिती (डीप डिप्रेशन) झाली आहे. ही प्रणाली मंगळवारी सायंकाळनंतर बांग्लादेशाच्या किनाऱ्याला धडकली.

ही कमी दाब प्रणाली आज (ता. २) वायव्येकडे सरकून पश्चिम बंगालकडे जाण्याचे संकेत आहे. मॉन्सूनचा आस असलेला कमी दाब पट्ट्याचे पश्चिमेकडील टोक हिमालयाच्या पायथ्याकडे गेले आहे. मॉन्सूनचा आस गोरखपूर, पाटना, श्रीनिकेतन, कैनिंग, कमी दाबाचे केंद्र ते ईशान्य बंगालच्या उपसागरापर्यंत सक्रिय आहे.

राज्यात पावसाने उघडीप दिली असून, ढगाळ हवामानासह ऊन सावल्यांचा खेळ सुरू आहे. अधून-मधून हलक्या सरी येत आहेत. आज (ता. २) कोकण, घाटमाथा, पूर्व विदर्भात तुरळक ठिकाणी जोरदार पावसाचा इशारा आहे.

रायगड, रत्नागिरीसह पुणे, सातारा जिल्ह्याच्या घाटमाथ्यावर तुरळक ठिकाणी जोरदार पावसाचा 'ऑरेंज अलर्ट' आहे. खानदेश, मराठवाडा, पूर्व विदर्भात विजांसह पावसाची शक्यता असून, उर्वरित राज्यात हलक्या पावसाचा अंदाज हवामान विभागाने वर्तविला आहे.

जोरदार पावसाचा इशारा (ऑरेंज अलर्ट) :

रायगड, रत्नागिरी, पुणे, सातारा.

जोरदार पावसाचा इशारा (येलो अलर्ट) :

पालघर, ठाणे, मुंबई, सिंधुदुर्ग, कोल्हापूर, नांदेड, भंडारा, गोंदिया, गडचिरोली.

विजांसह पावसाचा इशारा (येलो अलर्ट) :

धुळे, जळगाव, नाशिक, जालना, परभणी, हिंगोली, लातूर, बुलडाणा, अमरावती, अकोला, वाशीम, यवतमाळ, वर्धा, नागपूर, चंद्रपूर.