Pune News: राज्यातील काही भागात मागील ३ दिवसांपासून हलका ते मध्यम पाऊस हजेरी लावत आहे. हवामान विभागाने पुढील ५ दिवस काही ठिकाणी पावसाचा अंदाज दिला. आज आणि उद्या पावसाचे प्रमाण काहीसे अधिक आहे. तर सोमवारपासून पाऊस कमी होईल, असाही अंदाज हवामान विभागाने दिला.

हवामान विभागाने आज राज्यातील मराठवाडा, मध्य महाराष्ट्र आणि कोकणात काही ठिकाणी हलक्या ते मध्यम पावसाचा अंदाज दिला. मराठवाड्यातील छत्रपती संभाजीनगर, जालना, परभणी, हिंगोली, नांदेड, लातूर, बीड आणि धाराशिव जिल्ह्यात काही ठिकाणी विजा आणि मेघगर्जनेसह हलक्या ते मध्यम पावसाचा येलो अलर्ट देण्यात आला आहे.

तर मध्य महाराष्ट्रातील पुणे, सातारा, सांगली, सोलापूर, कोल्हापूर, अहिल्यानगर, नाशिक आणि जळगाव जिल्ह्यात काही ठिकाणी हलक्या ते मध्यम पावसाचा अंदाज आहे. कोकणातील सिंधुदूर्ग आणि रत्नागिरी जिल्ह्यातही काही ठिकाणी जोरदार पावसाची शक्यता वर्तविण्यात आली. कोकणातील इतर जिल्ह्यांमध्येही ढगाळ हवामानासह हलक्या पावसाचा अंदाज हवामान विभागाने दिला.

उद्या विदर्भातील बुलडाणा, अकोला, वर्धा आणि नागपूर तसेच मराठवाड्यातील बीड, धाराशिव, लातूर, नांदेड, परभणी आणि हिंगोली जिल्ह्यात तर मध्य महाराष्ट्रातील सातारा, सांगली, सोलपूर आणि कोल्हापूर तसेच कोकणातील सिंधुदूर्ग आणि रत्नागिरी जिल्ह्यात काही ठिकाणी जोरदार पावसाचा अंदाज हवामान विभागाने दिला. मराठवाडा, मध्य महाराष्ट्र आणि कोकणातील इतर जिल्ह्यांमध्ये ढगाळ वातावरणासह हलक्या पावसाच्या सरी पडतील, असाही अंदाज हवामान विभागाने दिला.

सोमवारपासून राज्यातील पावसाचे प्रमाण कमी होणार आहे. विदर्भ, मराठवाडा, मध्य महाराष्ट्रात सोमवार आणि मंगळवारी काही ठिकाणी हलक्या ते मध्यम पावसाचा अंदाज आहे. बुधवारी पूर्व विदर्भ, दक्षिण मराठवाडा आणि कोकणात काही ठिकाणी हलक्या ते मध्यम पावसाची शक्यता हवामान विभागाने वर्तविली आहे.