IMD Alert : राज्याच्या अनेक भागात सलग तीन दिवस जोरदार हजेरी लावल्यानंतर आज म्हणजेच बुधवारीही काही भागात पाऊस झाला. तसेच हवामान विभागाने आज आणि उद्याही काही भागात पाऊस पडू शकतो, असा अंदाज व्यक्त केला.

हवामान विभागाने आजही राज्याच्या अनेक भागात पावसाचा अंदाज दिला. पुणे, नाशिक, नगर, छत्रपती संभाजीनगर, बीड तसेच बुलडाणा, अकोला, वाशीम, अमरावती आणि यवतमाळ या जिल्ह्यांमध्ये विजा आणि ढगांच्या गडगडाटासह ठिकठिकाणी हलक्या ते मध्यम पावसाचा अंदाज व्यक्त केला. या जिल्ह्यांना येलो अलर्ट देण्यात आला. तसेच कोकण, मध्य महाराष्ट्र, मराठवाडा आणि विदर्भातील अनेक भागात विजांसह हलक्या ते मध्यम पावसाचा अंदाज आहे.

तसेच उद्या म्हणजेच गुरुवारीही राज्याच्या काही भागात जोरदार पाऊस पडू शकतो. नाशिक, छत्रपती संभाजीनगर, जळगाव विदर्भातील बुलडाणा, अकोला, अमरावती, वाशीम आणि यवतमाळ जिल्ह्यात काही ठिकाणी विजा आणि ढगांच्या गडगडाटासह हलक्या ते मध्यम पावसाचा येलो अलर्ट देण्यात आला. तसेच रायगड, ठाणे, जालना आणि धुळे जिल्ह्यात काही ठिकाणी हलक्या सरी पडतील, असाही अंदाज हवामान विभागाने दिला.