Pune News: विदर्भातील काही भागात पावसाला पोषक स्थिती आहे, तर काही ठिकाणी उन्हाचा कडाकाही चांगलाच वाढला. राज्यातील इतर भागातही काही ठिकाणी उष्ण आणि दमट हवामानाचा अंदाज हवामान विभागाने दिला. 

विदर्भातील भंडारा जिल्ह्यात आज ढगांच्या गडगडाटासह हलक्या ते मध्यम पावसाचा अंदाज देण्यात आला. चंद्रपूर, गडचिरोली जिल्ह्यात शनिवार, रविवार आणि सोमवारी काही भागात हलक्या ते मध्यम पावसाचा अंदाज हवामान विभागाने दिला.

यवतमाळ जिल्ह्यात आज आणि उद्या, वर्धा, नागपूर आणि गोंदीया जिह्यात जिल्ह्यात आज आणि सोमवारी काही ठिकाणी विजा तसेच ढगांच्या गडगडाटासह हलक्या पावसाचा अंदाज आहे. तर यावेळी ३० ते ४० किलोमीटर प्रतितास वेगाने वारे वाहतील, असाही अंदाज हवामान विभागाने दिला. 

सोलापूर, सांगली आणि कोल्हापूर जिल्ह्यातही काही ठिकाणी विजा आणि ढगांच्या गडगडाटासह हलक्या ते मध्यम पावसाचा अंदाज हवामान विभागाने दिला. तर पुणे आणि अहिल्यानगर जिल्ह्यात काही ठिकाणी उष्ण आणि दमट हवामानाचा इशाराही हवामान विभागाने दिला. पुणे, कोल्हापूर, सातारा, सोलापूर जिल्ह्यात उद्या काही ठिकाणी उष्ण आणि दमट हवामानाचा इशारा आहे. 

अकोला जिल्ह्यात काही ठिकाणी सोमवार, मंगळवार आणि बुधवारी उष्णतेच्या लाटेचा इशाराही हवामान विभागाने दिला. तर अमरावती, गडचिरोली जिल्ह्यात सोमवारी, चंद्रपूर जिल्ह्यात सोमवारी आणि मंगळवारी तसेच यवतमाळ जिल्ह्यात मंगळवारी आणि बुधवारी उष्ण आणि दमट हवामानाचा अंदाज हवामान विभागाने दिला.