Pune News: माॅन्सूनने दोन दिवसांच्या प्रतिक्षेनंतर आज देशाच्या आणखी काही भागात प्रगती केली. देशाचा अगदी थोड्या भागात माॅन्सून पोचला नाही. तर विदर्भ, कोकण, खानदेश आणि मध्य महाराष्ट्रातील घाटमाथ्यावर पुढील ५ दिवस जोरदार पावसाचा अंदाज हवामान विभागाने वर्तविला.

राज्यातील अनेक भागात पुढील ५ दिवस हलक्या ते मध्यम पावसाचा अंदाज हवामान विभागाने दिला. कोकणातील सर्वच जिल्ह्यांमध्ये काही ठिकाणी जोरदार पावसाचा अंदाज आहे. कोकणातील बहुतांशी भागात पुढील ५ दिवस ऑरेंज अलर्ट देण्यात आला. मध्य महाराष्ट्रात या काळात काही ठिकाणी हलक्या ते मध्यम पावसाची शक्यता वर्तविण्यात आली. मात्र घाटमाथ्यावर जोरदार पावसाचा अंदाज देण्यात आला. 

विदर्भातील सर्वच जिल्ह्यांमध्ये पुढील ५ दिवस काही ठिकाणी मध्यम ते जोरदार पावसाचा येलो अलर्ट देण्यात आला. खानदेशातील ३ जिल्ह्यांमध्येही काही ठिकाणी जोरदार पावसाची शक्यता वर्तविण्यात आली. मराठवाड्यातील छत्रपती संभाजीनगर, जालना, परभणी, हिंगोली आणि नांदेड जिल्ह्यात पुढील ३ दिवस काही ठिकाणी जोरदार पावसाची शक्यता आहे. तर इतर भागात हलक्या ते मध्यम पावसाची काही ठिकाणी शक्यता असल्याचेही हवामान विभागाने म्हटले आहे. 

माॅन्सूनने आजही देशाच्या काही भागात प्रगती केली. माॅन्सूनने उत्तर अरबी समुद्राचा आणि हिमाचल प्रदेश तसेच जम्मुचा उरलेला भाग व्यापला. तर पश्चिम उत्तर प्रदेशचा आणखी काही भाग, हरियानाचा आणखी काही भाग, चंदीगडचा आणखी काही भाग आणि पंजाबचा आणखी काही भाग माॅन्सूनने व्यापला. 

माॅन्सूनची सिमा आज बारमेर, जोधपूर, जयपूर, आग्रा, रामपूर, बिजनोर, कर्नाल आणि हलवारा भागात होती. माॅन्सूनच्या वाटचालीसाठी पोषक हवामान आहे. त्यामुळे पुढील ३६ तासांत माॅन्सून राजस्थान, पंजाब आणि हरियानाच्या काही भागात प्रगती करण्याची शक्यता आहे. तर पश्चिम उत्तर प्रदेशाचा उरलेला भागही माॅन्सून व्यापेल, असा अंदाज हवामान विभागाने दिला.