Pune News : दक्षिण महाराष्ट्रात मॉन्सूनोत्तर पावसाचा धुमाकूळ सुरू आहे. कोकणातील रत्नागिरी, सिंधुदुर्ग आणि मध्य महाराष्ट्रातील सातारा, सांगली, कोल्हापूर जिल्ह्यांत हलका ते मध्यम स्वरूपाच्या सरी बरसत आहेत. सिंधुदुर्गातील सावंतवाडी, बांदा, मडुरा येथे सर्वाधिक ११० मिलिमीटर पाऊस पडला. सतत पडत असलेल्या पावसामुळे पिकांचे नुकसान होऊ लागले आहे.

गेल्या पाच ते सहा दिवसांपासून दक्षिण महाराष्ट्रात पाऊस पडत आहे. कोकणातील रत्नागिरी जिल्ह्यातील कुंभवडे येथे ६० मिलिमीटर पाऊस झाला. सिंधुदुर्गातील श्रावण येथे ९६ मिलिमीटर, तर शिरोडा येथे ८२ मिलिमीटर पाऊस पडला असून, तळकट ७६, पडेल, पोइप ७१, आजगाव ६९ मिलिमीटर पाऊस झाला.

या पावसामुळे भात खाचरात पाणी साचत असून, निसवण्याच्या अवस्थेत असलेल्या भात पिकांचे नुकसान होऊ लागले आहे. मध्य महाराष्ट्रातही काही अंशी ढगाळ वातावरण असले, तरी दुपारी कडक ऊन पडत आहे.

तर सायंकाळी ढग भरून येत असून, वादळी वाऱ्यासह पाऊस पडत आहे. नगरमधील कर्जत येथे २२ मिलिमीटर, तर साताऱ्यातील कराड, मलकाप येथे २० मिलिमीटर, तर कळे २५ मिलिमीटर पाऊस झाला. सांगलीतील कुंडल येथे ५५ मिलिमीटर, पलूस ५५, येळवी ४५, मनेराजुरी ४४, तासगाव, भिलवडी ४० मिलिमीटर पाऊस झाला. कोल्हापुरातील कराडवाडी, गारगोटी येथे ४७ मिलिमीटर, पिंपळगाव ४६, कडेगाव, बिद्री, कूर ४४ मिलिमीटर पाऊस झाला.