Pune News: राज्यातील कमाल तापमानात वाढ झाल्याने बहुतांशी भागात चटका वाढला. तर राज्यातील बहुतांशी भागात किमान तापमानातही वाढ झाली. आज निफाड येथील गहू संशोधन केंद्रात १० अंश सेल्सिअस तापमानाची नोंद झाली. तर सोलापूर येथे सर्वाधिक ३७.७ अंश तापमान होते. राज्यातील तापमानातील वाढ कायम राहील, असा अंदाज हवामान विभागाने दिला. 

उत्तरेतील राज्यांमध्येही अनेक भागात कमाल आणि किमान तापमानात वाढ झाल्याचे दिसत आहे. नैॡत्य राजस्थान आणि परिसरावर समुद्र सपाटीपासून १.५ किलोमीटर उंचीवर चक्राकार वारे वाहत आहेत.

आज पंजाबमधील अमृतसर येथे देशाच्या सपाट भूभागावरील नीचांकी ८.४ अंश सेल्सिअस तापमानाची नोंद झाली. उत्तर भारतातील तापमानातील चढ उतार कायम राहतील, असा अंदाज हवामान विभागाने दिला. 

राज्यातही किमान आणि कमाल तापमानात वाढ होत आहे. राज्यातील सकाळचे किमान तापमान १० अंश ते २० अंशाच्या दरम्यान पोचले आहे. तर कमाल तापमानाने अनेक भागात ३६ अंशाचा टप्पा पार केला.

तापमानातील तफावत वाढल्याचा फटका रब्बी पिकांना बसत असल्याचे शेतकरी सांगत आहेत. राज्यातील तापमानातील वाढ कायम राहील, असा अंदाज हवामान विभागाने दिला.