Pune News: मराठवाडा आणि दक्षिण मध्य महाराष्ट्रात काही ठिकाणी हलक्या पावसाचा अंदाज हवामान विभागाने दिला. तर विदर्भातील अनेक भागात पुढील ५ दिवस उष्णतेच्या लाटेचा इशारा हवामान विभागाने दिला. 

धाराशिव, लातूर, नांदेड, सोलापूर जिल्ह्यात आज आणि उद्या पावसाचा अंदाज असून गुरुवार आणि शुक्रवारी उष्ण आणि दमट हवामानाचा देण्यात आला. सांगली, कोल्हापूर, सिंधुदूर्ग जिल्ह्यात आज पावसाचा अंदाज देण्यात आला.

हिंगोली आणि परभणी जिल्ह्यात बुधवारपासून शुक्रवारपर्यंत उष्ण आणि दमट हवामानाची शक्यता आहे. जालना, बीड, छत्रपती संभाजीनगर जिल्ह्यात पुढील ५ दिवस उष्ण आणि दमट हवामानाची शक्यता वर्तविण्यात आली. 

विदर्भात उन्हाचा चटका चांगलाच वाढला. अकोला जिल्ह्यातील काही भागात आजपासून पुढील ५ दिवस उष्णतेच्या लाटेचा इशारा देण्यात आला. अमरावती जिल्ह्यातही काही ठिकाणी आजपासून बुधवारपर्यंत उष्णतेची लाट राहील, अशी शक्यता हवामान विभागाने वर्तविली.

चंद्रपूर जिल्ह्यात आजपासून गुरुवारपर्यंत उष्णतेच्या लाटेचा इशारा देण्यात आला. नागपूर जिल्ह्यात काही ठिकाणी मंगळवार, बुधवार आणि गुरुवारी उष्णतेच्या लाटेचा इशारा आहे. वर्धा जिल्ह्यात बुधवारी आणि गुरुवार उष्णतेची लाट राहील, असा अंदाज हवामान विभागाने दिला.