Parbhani News : परभणी- हिंगोली जिल्ह्यांतील अनेक मंडलांत शुक्रवारी (ता. १४) सकाळी आठपर्यंतच्या २४ तासांमध्ये मेघगर्जना, वादळी वाऱ्यासह हलका ते जोरदार पाऊस (Unseasonal Rain) झाला.

हळद, कापूस, ज्वारी, गहू आदींसह फळे, भाजीपाला (Vegetable) पिकांचे नुकसान (Crop Damage) झाले. काढणी केलेला शेतमाल झाकून ठेवण्यासाठी शेतकऱ्यांची तारांबळ उडाली.

गुरुवारी (ता. १३) दिवसभर उकाडा जाणवत होता. रात्री साडेनऊच्या सुमारास वादळी वारे, मेघगर्जनेसह पाऊस झाला. मध्यरात्रीनंतर अनेक भागांत जोरदार पाऊस झाला.

परभणी जिल्ह्यातील परभणी, जिंतूर, सोनपेठ, गंगाखेड, पालम, पूर्णा या तालुक्यांतील २० मंडलांत हलका ते जोरदार पाऊस झाला.

परभणी, सोनपेठ, गंगाखेड तालुक्यांतील अनेक मंडलांत पावसाचा जोर अधिक होता. जिल्ह्यात सरासरी १.८ मिमी पाऊस झाला. एप्रिल महिन्यात सरासरी ४.७ मिमी पाऊस झाला आहे.

वसंतराव नाईक मराठवाडा कृषी विद्यापीठातील हवामानशास्त्र विभागाच्या वेधशाळेत ४.५ मिमी पावसाची नोंद झाली.

हिंगोली जिल्ह्यातील वसमत, औंढा नागनाथ तालुक्यांतील अनेक मंडलांत वादळी वारे, मेघगर्जनेसह हलका ते मध्यम पाऊस झाला. या दोन जिल्ह्यांतील हळद काढणी सुरू आहे. रात्री अचानक आलेल्या पावसामुळे हळद भिजली आहे.

वादळामुळे आंब्यांची फळगळ झाली. उशिरा पेरणी केलेली ज्वारी, गहू या पिकांसह वेचणीस आलेल्या कापूस, फळे, भाजीपाल्याचे नुकसान झाले.