Pune News : उत्तरेकडील थंड वाऱ्यांनी महाराष्ट्राकडे कूच केल्याने राज्यात पारा घसरू लागला आहे. उत्तर महाराष्ट्रात पारा १० अंशांच्या खाली येत थंडीचा कडाका वाढल्याने हुडहुडी भरली आहे.

निफाड येथील गहू संशोधन केंद्रात राज्याचे यंदाच्या हंगामातील नीचांकी ६.५ अंश सेल्सिअस तापमानाची नोंद झाली आहे. आज (ता. १६) राज्यात थंडी कायम राहण्याचा अंदाज हवामान विभागाने वर्तविला आहे.

उत्तर भारतात थंडीचा कडाका कायम असून, रविवारी (ता. १४) पंजाबच्या लुधियाना येथे देशाच्या सपाट भूभागावरील नीचांकी १ अंश सेल्सिअस तापमान नोंदले गेले. पंजाब, हरियाणा, चंदीगड, दिल्ली, उत्तर प्रदेश, बिहारमध्ये दाट धुक्याचे साम्राज्य पाहायला मिळाले. तसेच आज (ता. १६) पंजाब, हरियाणा, चंदीगड, दिल्ली राज्यात थंडीची तीव्र लाट कायम राहण्याची शक्यता आहे.

राज्यात किमान तापमानात घट होऊ लागली असून, निफाडपाठोपाठ धुळे येथील कृषी महाविद्यालयात ७.४ अंश सेल्सिअस, तर जळगाव येथे ९.९ तापमानाची नोंद झाली. कोकण वगळता उर्वरित राज्याच्या बहुतांश भागात किमान तापमान १२ ते १७ अंशांच्या दरम्यान आहे. राज्यात किमान तापमानात घट होत थंडी कायम राहण्याची शक्यता हवामान विभागाने वर्तविली आहे.

सोमवारी (ता. १५) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअस मध्ये) :

पुणे ३२.८ (१२.२), धुळे ३१.० (७.४), जळगाव ३१.४ (९.९), कोल्हापूर ३२.६ (१९.५), महाबळेश्वर २७.७ (१४.५), नाशिक ३०.६ (११.१), निफाड २९.० (६.५), सांगली ३३.३ (१७.३), सातारा ३२.१ (१५.०), सोलापूर ३४.८(१७.०), सांताक्रूझ ३४.६ (१८.७), डहाणू ३१.० (१७.०), रत्नागिरी ३४.३ (२०.२),

छत्रपती संभाजीनगर ३०.८ (१०.२), नांदेड ३१.८ (१५.४), परभणी ३१.८ (१४.६), अकोला ३२.५ (१३.०), अमरावती ३१.२ (१२.५), बुलडाणा ३०.७ (१२.२), ब्रह्मपुरी ३२.८ (१७.९), चंद्रपूर ३२.० (१५.४), गडचिरोली ३०.० (१४.८), गोंदिया ३०.४ (१५.४), नागपूर ३१.४(१६.६), वर्धा ३२.०(१५.९), वाशीम ३२.४ (११.४), यवतमाळ ३३.० (१२.०).