Pune News : उत्तरेतील राज्यांमध्ये थंडीचा कडाका कायम आहे. अनेक भागात दाट धुक्याची चादरही दिसून येत आहे. राज्यात मात्र किमान तापमान अजूनही सरासरीपेक्षा जास्तच आहे. 

उत्तर भारतातील काही भागात थंडीची लाट आहे. पूर्व राजस्थान, पंजाबमध्ये थंडीची लाट आहे. तसेच हरियाना आणि पश्चिम राजस्थानमधील काही भागातही थंडीची लाट आहे. पंजाबमधील अमृतसर येथे किमान १.४ अंशाची नोंद झाली होती.

तर पंजाब, हरियाना, चंदीकड, दिल्ली, राजस्थान आणि उत्तर प्रदेश, दक्षिण राजस्थान, उत्तर मध्य प्रदेश तसेच बिहारच्या काही भागात किमान तापमान ३ ते ७ अंशाच्या दरम्यान होते. यासोबतच हरियाना, चंदीगड, दिल्लीच्या काही भागात दाट धुक्याची चादर पसरली होती. 

राज्यातही काही भागात पुन्हा थंडीत वाढ झाल्याचे दिसते. पण राज्यातील अनेक भागात किमान तापमान सरासरीपेक्षा जास्तच होती. उत्तरेकडे थंडीचा कडाका कायम असल्याने राज्यात पुढील काही दिवसांमध्ये थंडी पुन्हा हातपाय पसरवू शकते. पुढील दोन ते तीन दिवसांमध्ये अनेक भागात किमान तापमान कमी झालेले दिसू शकते, असा अंदाज आहे.