Pune News : हवामान विभागाने आज आणि उद्या उत्तर महाराष्ट्र आणि उत्तर कोकणात तुरळक ठिकाणी हलक्या पावसाचा अंदाज दिला आहे. तर राज्यातील बहुतांशी भागात थंडी वाढली आहे.  

अनेक ठिकाणी तापमानाचा पारा १० अंशांखाली घसरला. आज निफाड, धुळे, नगर, बीड, जळगाव या ठिकाणी तापमान १० अंशांपेक्षा कमी होते. तर राज्यातील थंडी कायम राहील, असा अंदाज हवामान विभागाने व्यक्त केला. 

आग्नेय अरबी समुद्रात केरळच्या किनाऱ्यालगत चक्राकार वारे वाहत आहेत. पश्‍चिमी चक्रवातामुळे उत्तरेकडील राज्यांमध्ये थंडीची लाट आली असून, दाट धुक्याचे साम्राज्य दिसून येत आहे.

उत्तरेकडील थंड वाऱ्यांच्या प्रवाहामुळे राज्यातही थंडी वाढत आहे. आज धुळे येथील कृषी महाविद्यालयात ६ अंशाची नोंद झाली होती. तर निफाड येथील गहू संशोधन केंद्रात ७.८ अंशाची नोंद झाली होती. 

हवामान विभागाने आज पालघर, धुळे, नंदूरबार, जळगाव, नाशिक जिल्ह्यात काही ठिकाणी ढगाळ वातावरणासह हलक्या पावसाचा अंदाज दिला. तर उद्या परभणी, बीड, जालना, छत्रपती संभाजीनगर, अहिल्यानगर, नाशिक, जळगाव आणि ठाणे जिल्ह्यात काही ठिकाणी ढगाळ वातावरणासह हलक्या पावसाचा अंदाज हवामान विभागाने दिला.