Pune News : राज्याच्या किमान तापमानात सातत्याने घट होत असल्याने थंडीची चाहूल लागली आहे. कमाल तापमानातही घट झाल्याने उन्हाचा चटका हळूहळू कमी होत आहे. गुरुवारी (ता. २६) सकाळपर्यंतच्या २४ तासांमध्ये जळगाव येथे राज्यातील नीचांकी ११ अंश सेल्सिअस तापमानाची नोंद झाली आहे.

अरबी समुद्र आणि बंगालच्या उपसागरातील दोन्ही चक्रीवादळे निवळून गेली आहेत. उत्तर तमिळनाडूच्या किनाऱ्यालगत समुद्र सपाटीपासून १.५ ते ३.१ किलोमीटर उंचीवर, तसेच दक्षिण तमिळनाडूमध्ये ९०० मीटर उंचीवर चक्राकार वाऱ्यांच्या स्थिती आहेत. उत्तरेकडून थंड वारे येऊ लागल्याने राज्याच्या किमान तापमानात घट होऊ लागली आहे.

गुरुवारी (ता. २६) सकाळपर्यंतच्या २४ तासांमध्ये कोकणातील सांताक्रूझ येथे राज्यातील उच्चांकी ३६.५ अंश सेल्सिअस तापमानाची नोंद झाली. सोलापूर, रत्नागिरी येथे तापमान ३६ अंशांच्या वर आहे. उर्वरित महाराष्ट्राच्या कमाल तापमानात घट झाल्याची पाहायला मिळाली. तर किमान तापमानात घट होत असल्याने उत्तर महाराष्ट्रातील जळगावसह निफाड, छत्रपती संभाजीनगर आणि यवतमाळ येथे पारा १४ अंशांच्या खाली आला आहे. पहाटे गारठा जाणवू लागला असून, राज्यात थंडी हळूहळू वाढत जाणार आहे.

गुरुवारी (ता. २६) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअसमध्ये) : पुणे ३२.९ (१७.३), जळगाव ३५.२ (११), कोल्हापूर (२०.४), महाबळेश्‍वर २६.१ (१६.२), नाशिक ३२.१ (१५.३), निफाड ३२.२ (१३.६), सांगली ३३.६ (१८.७), सातारा ३२.३ (१६.८), सोलापूर ३६.१ (१७), सांताक्रूझ ३६.५ (२२.४), डहाणू ३५ (२२.५), रत्नागिरी ३६.४ (२३.१), छत्रपती संभाजीनगर ३३.२ (१५), नांदेड ३३.२ (१८), परभणी ३४.१ (१६.१), अकोला ३५ (१७), अमरावती ३२.६ (१६.३), बुलडाणा ३२.६ (१७.६), ब्रह्मपुरी ३३.७ (१८.१), चंद्रपूर ३२.६(१७), गडचिरोली ३१ (१७), गोंदिया ३१.६ (१५.८), नागपूर ३२.६ (१७), वर्धा ३२.५ (१६.८), वाशीम ३४ (१५.४) यवतमाळ ३४.२ (१४).