Pune News : उत्तर भारत आणि राज्यातही आज काही भागात थंडी वाढली होती. राज्यात किमान तापमानात घट झाल्याने गारठा कायम आहे. असे असतानाही राज्यातील थंडीचे प्रमाण सरासरीपेक्षा कमीच आहे. हवामान विभागाने राज्यातील काही भागात अंशतः ढगाळ वातावरणाचा अंदाज दिला. त्यामुळे तापमानात काहीसे चढ उतारही राहू शकतात, असेही म्हटले आहे.

उत्तर भारतात थंडीच्या कडाक्यातही चढ उतार सुरु आहेत. एकामागोमाग येणाऱ्या पश्‍चिमी चक्रवातांमुळे थंडी सातत्याने कमी-अधिक होत आहे. आज पंजाबमधील आदमपूर येथे देशाच्या सपाट भूभागावरील नीचांकी ३.८ अंश सेल्सिअस तापमानाची नोंद झाली.

तर राजस्थान आणि परिसरावर चक्राकार वाऱ्यांची स्थिती आहे. वायव्य भारतात १५० नॉट्स वेगाने पश्‍चिमेकडील जोरदार वाऱ्यांचे झोत कायम आहेत. या परिस्थितीचा राज्यातील थंडीवरही परिणाम होत आहे.

राज्यातील किमान तापमानतही चढ उतार कायम आहेत. काही भागात थंडीचे प्रमाण जास्त दिसत आहे. विशेष करून उत्तर महाराष्ट्र, मराठवाडा आणि विदर्भातील काही भागात थंडी तुलनेत अधिक जाणवत आहे. तर काही भागात धुक्याची दुलई पाहायला मिळत आहे.

किमान तापमानाचा पारा घसरल्याने उत्तर महाराष्ट्र व मराठवाड्यात तुरळक ठिकाणी तापमान १० अंशांच्या खाली घसरले आहे. आज निफाड येथील गहू संशोधन केंद्रात ९.२ अंश सेल्सिअस तापमानाची नोंद झाली होती. तर धुळे येथे ९.५ अंशाची नोंद झाली.

कोकण, मध्य महाराष्ट्र आणि मराठवाड्यात अंशतः ढगाळ हवामान राहण्याचा अंदाज आहे. ढगाळ हवामानामुळे या भागातील किमान तापमानात चढ-उतार होण्याची शक्यता आहे, असा अंदाज हवामन विभागाने दिला.