Pune News: राज्यात पावसाला पोषक हवामान होत आहे. दुपारी उन्हाचा चटका जाणवत आहे, तर सांयकाळी काही भागात हलक्या सरी पडल्या. विदर्भ, मराठवाडा, मध्य महाराष्ट्रात पुढील ५ दिवस काही ठिकाणी हलक्या पावसाचा अंदाज हवामान विभागाने दिला. 

विदर्भात जिल्ह्यांमध्ये पुढील ३ ते ५ दिवस पावसाची शक्यता आहे. अकोला जिल्ह्यात आज तसेच शनिवार आणि रविवारी तर बुलडाणा, वाशीम आणि अमरावती जिल्ह्यात शनिवारी आणि रविवारी काही ठिकाणी विजा तसेच ढगांच्या गडगडाटासह हलक्या ते मध्यम पावसाचा अंदाज आहे.

भंडारा, चंद्रपूर, गडचिरोली, गोंदीया, नागपूर, वर्धा आणि यवतमाळ जिल्ह्यात काही ठिकाणी पुढील ५ दिवस विजा तसेच ढगांच्या गडगडाटासह हलक्या ते मध्यम पावसाची शक्यता हवामान विभागाने वर्तविली. 

मराठवाड्यातील छत्रपती संभाजीनगर, जालना, नांदेड, बीड, धाराशिव, परभणी, हिंगोली आणि लातूर जिल्ह्यात काही ठिकाणी हलक्या पावसाचा अंदाज हवामान विभागाने दिला. तसेच धुळे, नंदूरबार, नाशिक जिल्ह्यात शनिवार, रविवार आणि सोमवारी काही ठिकाणी  विजा तसेच ढगांच्या गडगडाटासह हलक्या ते मध्यम पावसाचा अंदाज आहे. अहिल्यानगर, पुणे, कोल्हापूर, सातारा, सांगली जिल्ह्यातही शनिवारी आणि रविवारी पावसाचा अंदाज देण्यात आला. 

राज्यातील काही भागात पुन्हा एकदा तापमान ४५ अंशाच्या दरम्यान पोचले. विदर्भात उन्हाचा चटका चांगला वाढला आहे. अकोला येथे आज राज्यातील सर्वाधिक ४५ अंश सेल्सिअस तापमानाची नोंद झाली.