Pune News: राज्यातील काही भागात पावसाला पोषक स्थिती कायम आहे. मध्य महाराष्ट्र आणि मराठवाड्यातील काही ठिकाणी पावसाचा अंदाज आहे. विदर्भात उन्हाचा चटका चांगलाच वाढला. अकोला येथे राज्यातील सर्वाधिक ४४.२ अंश सेल्सिअस तापमानाची नोंद झाली.

हवामान विभागाने  कोल्हापूर, सातारा, सोलापूर आणि सांगली तसेच बीड जिल्ह्यात काही ठिकाणी हलक्या ते मध्यम पावसाचा अंदाज दिला. चंद्रपूर, अमरावती आणि अकोला जिल्ह्यात उष्णतेच्या लाटेचा इशाराही देण्यात आला. तर जालना, छत्रपती संभाजीनगर, नाशिक, जळगाव, नंदूरबार, धुळे, सिंधुदूर्ग, रत्नागिरी, रायगड, मुंबई, ठाणे आणि पालघर जिल्ह्यात आज आणि उद्या काही ठिकाणी उष्ण आणि दमट हवामानाचा अंदाज आहे.

सोलापूर, परभणी जिल्ह्यात उद्या तर लातूर जिल्ह्यात बुधवारी आणि गुरुवारी, धाराशिव जिल्ह्यात बुधवारी आणि गुरुवारी, अमरावती जिल्ह्यात शुक्रवारी, चंद्रपूर जिल्ह्यात गुरुवार, शुक्रवार आणि शनिवारी पावसाचा अंदाज आहे. तर गडचिरोली, भंडारा, गोंदीया जिल्ह्यात शनिवारी तसेच नागपूर, वर्धा जिल्ह्यात शुक्रवारी तर वाशीम जिल्ह्यात गुरुवारी आणि यवतमाळ जिल्ह्यात गुरुवार आणि शुक्रवारी काही ठिकाणी विजा आणि ढगांच्या गडगडाटासह हलक्या ते मध्यम पावसाचा अंदाज आहे.

तर दुसरीकडे दोन दिवसात विदर्भात उन्हाचा चटका चांगलाच वाढला होता. अकोला येथे राज्यातील सर्वाधिक ४४.२ अंश सेल्सिअस तापमानाची नोंद झाली होती. ब्रम्हपुरी येथे ४३.८ अंश, चंद्रपूर आणि अमरावतीत ४३.६ अंश सेल्सिअस तापमानाची नोंद झाली होती. नागपूर, वर्धा, वाशीम आणि यवतमाळ जिल्ह्यातही ४२ अंशापेक्षा अधिक तापमान होते. राज्यातील इतर भागातही तापमान ४१ अंशाच्या दरम्यान पोचले आहे.