Pune News : नैॡत्य मोसमी वाऱ्यांच्या (मॉन्सून) परतीच्या प्रवासाला सुरुवात झाली असतानाच, राज्यात पुन्हा पाऊस सक्रिय झाला आहे. आज (ता. २४) राज्यात वादळी वारे, विजांसह जोरदार पावसाची शक्यता असल्याने कोकण, मध्य महाराष्ट्र, मराठवाड्यात दक्षतेचा इशारा (ऑरेंज अलर्ट) हवामान विभागाने दिला आहे. राज्यात सर्वदूर पावसाचा जोर वाढण्याची शक्यता आहे.

परतीचा प्रवास सुरू झाल्याने मॉन्सूनचा आस असलेला कमी दाबाचा पट्टा निवळून गेला आहे. मध्य बंगालच्या उपसागरात समुद्र सपाटीपासून ५.८ किलोमीटर उंचीवर चक्राकार वाऱ्यांची स्थिती आहे. या वाऱ्यांच्या प्रभावामुळे पूर्व-मध्य बंगालच्या उपसागरात आज (ता. २४) कमी दाबाचे क्षेत्र तयार होण्याचे संकेत आहेत.

पावसाला पोषक हवामान, ढगाळ आकाशामुळे कमाल तापमानात घट होण्याची शक्यता आहे. सोमवारी (ता. २३) सकाळपर्यंतच्या २४ तासांमध्ये नागपूर येथे राज्यातील उच्चांकी ३५ अंश सेल्सिअस तापमानाची नोंद झाली. अनेक ठिकाणी तापमान तिशी पार असल्याने उन्हाचा चटका तापदायक ठरत आहे. दुपारनंतर वादळी वाऱ्यासह वळीव स्वरूपाचा पावसाने हजेरी लावली आहे. मध्य महाराष्ट्र, मराठवाडा आणि कोकणात तुरळक ठिकाणी अतिवृष्टी झाली आहे.

आज (ता. २४) राज्यात पावसाचा जोर वाढण्याची शक्यता आहे. कोकणातील रायगड, रत्नागिरी, सिंधुदुर्ग, मध्य महाराष्ट्रातील सातारा, कोल्हापूर, तर मराठवाड्यातील बीड, परभणी, हिंगोली, नांदेड जिल्ह्यांत जोरदार वादळी वारे, विजांसह मुसळधार पावसाची शक्यता असल्याने दक्षतेचा इशारा (ऑरेज अलर्ट) देण्यात आला आहे. उर्वरित राज्यात विजांसह जोरदार पावसाचा अंदाज असल्याने सतर्कतेचा इशारा (येलो अलर्ट) हवामान विभागाने दिला आहे.

मंगळवारी (ता. २४) राज्यातील पावसाचा अंदाज दर्शविणारा नकाशा. (स्रोत : हवामान विभाग)

मुसळधार पावसाचा इशारा (ऑरेंज अलर्ट) :

रायगड, रत्नागिरी, सिंधुदुर्ग, सातारा, कोल्हापूर, बीड, परभणी, हिंगोली, नांदेड.

जोरदार पावसाचा इशारा (येलो अलर्ट) :

मुंबई, ठाणे, नाशिक, जळगाव, नगर, पुणे, छत्रपती संभाजीनगर, जालना, धाराशिव, लातूर, यवतमाळ, गडचिरोली.

विजांसह वादळी पावसाचा इशारा (येलो अलर्ट) : पालघर, नंदुरबार, धुळे, सांगली, सोलापूर, बुलडाणा, अकोला, वाशीम, अमरावती, वर्धा, नागपूर, भंडारा, गोंदिया, चंद्रपूर.