बुलडाणा ः जिल्ह्याच्या सीमेलगत मुक्ताईनगर तालुक्यात साकारत असलेल्या कुऱ्हा वडोदा इस्लामपूर उपसा सिंचन योजनेमुळे (Irrigation Scheme) जिल्ह्यातील जळगाव जामोद व संग्रामपूर तालुक्यातील सुमारे १७ हजार हेक्टरपेक्षा अधिक क्षेत्राला सिंचनासाठी (Irrigation) फायदा होणार आहे.

या योजनेच्या कामासाठी जळगावचे आमदार डॉ. संजय कुटे यांनी सातत्याने पाठपुरावा केला आहे. यामुळे आता योजनेसाठी तिसरी सुधारित प्रशासकीय मान्यता शासनाने दिली आहे. सुमारे २२२६ कोटी रुपयांचा हा निधी आहे.

जळगाव जिल्ह्याच्या मुक्ताईनगर तालुक्यात बुलडाण्यातील जिगाव धरणाच्या खालील बाजूस दोन किलोमीटर अंतरावर रिगाव गावाजवळून पूर्णा नदीचे १००.९२८ दलघमी पाणी पावसाळ्यात ३ टप्प्यांत उचलून या प्रकल्पांतर्गत बांधण्यात येणाऱ्या इस्लामपूर धरणामध्ये सोडण्याचे प्रस्तावित आहे.