Sugarcane News पुणे : राज्यातील ऊसतोड कामगारांच्या (Sugarcane Labor) कल्याणासाठी लोकनेते गोपीनाथ मुंडे (Gopinath Munde) ऊसतोड कामगार कल्याण महामंडळार्फत येत्या काळात अधिकाधिक योजनांचा लाभ देण्यात येणार आहे.

त्यासाठी ऊसतोड कामगारांच्या सर्वांगीण विकासासाठी कालबद्ध कार्यक्रम तयार करून असून दहा लाख ऊसतोड कामगारांना पाच लाख रुपयांचे विमा संरक्षणाची अंमलबजावणी करण्याचे निर्देश महामंडळाचे व्यवस्थापकीय संचालक डॉ. प्रशांत नारनवरे यांनी महामंडळाच्या अधिकाऱ्यांना दिले आहेत.

सी.आय.टी.यू. संलग्न महाराष्ट्र ऊसतोडणी व वाहतूक कामगार संघटनेच्या राज्यातील पदाधिकारी यांच्या शिष्टमंडळाची ऊसतोड कामगारांच्या विविध प्रश्‍नांबाबत पुण्यात गुरुवारी (ता. ९) बैठक आयोजित करण्यात आली होती.

त्याप्रसंगी आयुक्त डॉ. प्रशांत नारनवरे यांनी माहिती दिली आहे. या वेळी संघटनेचे राज्य अध्यक्ष डॉ. डी. एल. कराड, समाज कल्याण विभागाचे उपायुक्त रवींद्र कदम पाटील, प्रादेशिक उपायुक्त बाळासाहेब सोळुंकी, सहायक संचालक मारुती मुळे, प्रा. डॉ. सुभाष जाधव, प्रा. आबासाहेब चौगुले, नामदेव राठोड, सय्यद रजा, अंगत खरात, आनंदा डाफळे, पांडुरंग मगदूम, रामचंद्र कांबळे, किशोर राठोड आदी उपस्थित होते.