नांदेड : अतिवृष्टीमुळे (Wet Drought) शेतकऱ्यांच्या पिकांचे नुकसान (Crop Damage) झाल्यामुळे जिल्हाधिकारी अभिजित राऊत (Abhijeet Raut) यांनी हंगामातील प्रतिकूल परिस्थितीनुसार २५ टक्के आगाऊ परतावा शेतकऱ्यांना देण्याची अधिसूचना जारी केली होती. या अधिसूचनेला विमा कंपनीने (Crop Insurance) नुकतीच मंजुरी दिली आहे. यामुळे जिल्ह्यातील दहा लाख विमाधारक शेतकऱ्यांना जवळपास ४१० कोटींचा परतावा मिळण्याचा मार्ग मोकळा झाला आहे.

नांदेड जिल्ह्यात सततचा पाऊस तसेच अनेक मंडळात झालेल्या अतिवृष्टीमुळे खरिपातील सोयाबीन, कापूस, तूर, खरीप ज्वारी या पिकांचे मोठ्या प्रमाणात नुकसान झाले. यामुळे विमा कंपनीकडून आगाऊ परतावा शेतकऱ्यांनी देण्याची मागणी करण्यात येत होती. जिल्हाधिकारी अभिजित राऊत यांनी प्रधानमंत्री पीकविमा योजनेअंतर्गत सोयाबीन, कापूस, तूर व खरीप ज्वारी या पिकांसाठी हंगामातील प्रतिकूल परिस्थिती अधिसूचना लागू केली होती.

या अधिसूचनेद्वारे सर्वच ९३ महसूल मंडलांतील विमाधारक शेतकऱ्यांना पीक नुकसानीच्या प्रमाणात २५ टक्के रक्कम आगाऊ देण्यात येते. त्याअनुषंगाने गुरुवारी (ता. २०) जिल्हास्तरीय समितीच्या बैठकीमध्ये विमा कंपनीस दिलेल्या निर्देशानुसार चार पिकांसाठी विमा भरलेल्या सर्व शेतकऱ्यांना नुकसान भरपाई देण्याचे विमा कंपनीने मान्य केले. यामुळे नांदेड जिल्ह्यास जवळपास ४०० कोटी रुपये नुकसान भरपाई रक्कम मिळण्याचा मार्ग मोकळा झाला असल्याची माहिती जिल्हाधिकारी अभिजित राऊत यांनी दिली.

प्रशासनाच्या पाठपुराव्यामुळे परतावा मंजूर

जिल्ह्यातील शेतकऱ्यांचे अतिवृष्टीमुळे नुकसान झाल्यामुळे विमाधारक शेतकऱ्यांना भरपाईसाठी आगाऊ २५ टक्के परतावा मिळावा, यासाठी जिल्हा प्रशासनाने विमा कंपनीच्या संपर्कात राहून पाठपुरावा केला. यात जिल्हाधिकारी अभिजित राऊत, जिल्हा अधीक्षक कृषी अधिकारी रविशंकर चलवदे यांनी घेतलेल्या सकारात्मक भूमिकेमुळे जिल्ह्यातील शेतकऱ्यांना विमा कंपनीकडून आगाऊ ४०० कोटींवर परतावा मिळण्याचा मार्ग मोकळा झाला आहे.