Jalgaon News : खानदेशातील बाजारांत उडदाची आवक कमी आहे. परंतु दरांवर मागील काही दिवसांत दबाव वाढला असून, दर्जाचे कारण पुढे करून कमी दर दिले जात असल्याची स्थिती आहे. दर आठ हजार ते साडेनऊ हजार रुपये प्रतिक्विंटल वरून किमान ४५०० ते कमाल ६९०० रुपये प्रतिक्विंटलपर्यंत खाली आले आहेत.

खानदेशात कडधान्य किंवा उडीद, मुगासाठी जळगाव जिल्ह्यातील जळगाव, अमळनेर, चोपडा, चाळीगाव, पाचोरा, धुळ्यातील शिरपूर, दोंडाईचा (ता. शिंदखेडा), नंदुरबार या बाजार समित्या प्रसिद्ध आहेत. चोपडा, जळगाव येथील बाजार समितीत मागील पंधरवड्यात किंवा सप्टेंबरच्या तिसऱ्या आठवड्यात उडदाचे दर साडेआठ हजार ते साडेनऊ हजार रुपये व सरासरी नऊ हजार रुपये प्रतिक्विंटल, होते. परंतु मागील महिन्याच्या दुसऱ्या पंधरवड्यात पाऊस झाल्यानंतर उडीद दरात घसरण सुरू झाली. दर आता किमान ४५०० तर कमाल ६९०० ते ७००० रुपये प्रतिक्विंटल, असे आहेत. दर्जेदार उडदाचे दर ७००० रुपये प्रतिक्विंटल आहेत. परंतु एवढे दर मोजक्याच शेतकऱ्यांना मिळत असल्याचे दिसत आहे.

चोपडा येथील बाजार समितीत उडदाची आवक कमीच आहे. तेथे मागील सात दिवस उडदाची प्रतिदिन २० क्विंटल एवढीच आवक झाली आहे. जळगाव, अमळनेर, चोपडा या बाजार समित्यांत मिळून उडदाची रोज १२० क्विंटल आवक झाल्याचे चित्र आहे. परंतु दरात घसरण झाल्याने शेतकऱ्यांचे नुकसान होत आहे. खरेदीदार, अडतदार कमी दर्जाचे कारण सांगून कमी दर देत आहेत.

अनेक शेतकरी उडदाची मळणी करून त्याची वाळवणूक करून घेत आहेत. तो वाळवून व स्वच्छ करून बाजारात आणत आहेत. परंतु तरीदेखील दर सात हजार रुपयांवर नसल्याने नुकसान होत आहे. कारण खर्च अधिक लागत आहे. मळणी, कापणीचा खर्च एकरी पाच हजार रुपयांवर गेला आहे. उत्पादन यंदा एकरी अडीच ते तीन क्विंटल एवढेच येत आहे.