Rashtrawadi Crisis : राष्ट्रवादीच्या बंडानंतर अजित पवार यांनी शरद पवार यांच्या वयाचा उल्लेख करत त्यांना निवृत्त होण्याचा सल्ला दिला होता. त्यावर आज शरद पवार यांनी अजित पवार यांच्यावर हल्ला चढवला. 'तुमची तक्रार आमच्या धोरणांशी असेल, पण वय आणि व्यक्तिगत हल्ले केले तर याद राखा, अजून तुम्ही कुठं दम पाहिलायं', अशा शब्दात राष्ट्रवादीचे अध्यक्ष शरद पवार यांनी सुनावले.

अजित पवार यांच्यासह राष्ट्रवादीचा ओबीसी चेहरा म्हणून ओळखल्या जाणाऱ्या छगन भुजबळ यांनीही बंडखोरी केली. त्यांच्याविरोधात शरद पवार मैदानात उतरले आहेत. आज त्यांनी महाराष्ट्र दौरा सुरू केला आहे. पहिली सभा त्यांनी मंत्री छगन भुजबळ यांच्या येवला मतदारसंघात घेतली.

या सभेच्या सुरुवातीला नाशिककरांनी शरद पवार यांना फुले पगडी देऊन स्वागत केले. यावेळी व्यासपीठावर खासदार सुप्रिया सुळे, खा. अमोल कोल्हे, आमदार जितेंद्र आव्हाड, रोहित पवार यांच्यासह नाशिकमधील पदाधिकारी व कार्यकर्ते उपस्थित होते.

शरद पवार यांनी छगन भुजबळ यांचे नाव न घेता टीका केला. नाशिक जिल्ह्याने नेहमीच पुरोगामी विचारांना साथ दिली. जो उमेदवार दिला त्याच्या बाजूने निकाल दिला. इथं माझा अंदाज चुकला. माझ्या अंदाजावर निकाल दिले. पण, माझ्यामुळे तुम्हाला यातना झाल्या असल्या तरी मी माफी मागतो. पुन्हा मी अशी चूक करणार नाही. योग्य निकाल लावणार, असे सांगितले.

राज्यात अनेक ठिकाणी पाणी, उद्योगधंद्याचे प्रश्न प्रलंबित आहेत. राजकारण कशासाठी करायचे तर सामान्य माणसांचे प्रश्न सोडवण्यासाठी करायचे असते. आज आपल्यासमोर अनेक संकटे आहे. पण या जिल्ह्याने स्वाभिमानी कायम ठेवला. आतापर्यंत चुकीच्या गोष्टी झाल्या. त्या दुरुस्त केल्या पाहिजे, असे आवाहन पवारांनी नाशिककरांना केले.