मुंबई  : राज्यात तूर्तास तरी मध्यावधी निवडणूक होईल, असे वाटत नसल्याचे मत भाजपचे ज्येष्ठ नेते आणि माजी महसूलमंत्री एकनाथ खडसे यांनी व्यक्त केले.

आगामी महापालिका निवडणुकांच्या पार्श्वभूमीवर भाजपतर्फे शनिवारी (ता. १५) आणि रविवारी (ता. १६) नवी मुंबईत राज्यव्यापी अधिवेशनाचे आयोजन करण्यात आले आहे. शनिवारी या अधिवेशनात श्री. खडसे बोलत होते. श्री. खडसे म्हणाले की, महाविकास आघाडीमध्ये वेगवेगळ्या विषयांवर मतांतरे आहेत. आता ही मतांतरे उघडपणे होत असून, ती वाढत आहेत. याअंतर्गत विरोधामुळेच हे सरकार मोडेल. असे असले, तरी मध्यावधी निवडणूक तूर्त होईल, असे मला वाटत नाही. त्यांनाही काही काळ द्यावा लागेल. 

दरम्यान, भाजपचे प्रदेशाध्यक्ष चंद्रकांत पाटील यांनी भाजप महाराष्ट्रात मध्यावधी निवडणुकांची तयारी करणार असल्याचे वक्तव्य  केले होते. त्या पार्श्वभूमीवर एकनाथ खडसे यांचे मध्यावर्ती निवडणुकांवरील हे वक्तव्य महत्त्वाचे मानले जात आहे. भाजपमध्येच मध्यावधी निवडणुकांवरून दोन वेगळी मते असल्याचेही यानिमित्ताने समोर येत आहे. चंद्रकांत पाटील यांच्या या वक्तव्यानंतर राष्ट्रवादी काँग्रेसचे नेते सुनील तटकरे यांनी भाजपला संघटनात्मक कामावर लक्ष देण्याचा सल्ला दिला होता.

दरम्यान, नेरुळमध्ये शनिवारी सकाळी भाजप पदाधिकाऱ्यांची बैठक झाली. रविवारी (ता. १६) जे. पी. नड्डा अधिवेशनाला उपस्थित राहणार आहेत. या वेळी ते कार्यकर्त्यांना मार्गदर्शन करतील. या अधिवेशनात चंद्रकांत पाटील हे जे. पी. नड्डा यांच्या उपस्थितीत भाजप प्रदेशाध्यक्षपदाचा पदभार स्वीकारतील. तसेच, विरोधी पक्षनेते देवेंद्र फडणवीस या अधिवेशनाचा समारोप करतील. भाजप राष्ट्रीय सहसंघटनमंत्री व्ही. सतीश, केंद्रीय पर्यावरणमंत्री प्रकाश जावडेकर, रेल्वेमंत्री पीयूष गोयल, केंद्रीय राज्यमंत्री रावसाहेब दानवे, माजी प्रदेशाध्यक्ष सुधीर मुनगंटीवार, माजी ग्रामविकासमंत्री पंकजा मुंडे आदी नेते या अधिवेशनाला उपस्थित राहणार आहेत.