रत्नागिरी  ः जिल्ह्यात पावसाचा जोर कायम आहे. रत्नागिरी तालुक्यातील शिरगाव येथे वडाचे झाड कोसळून वाहतूक विस्कळीत झाली होती. पावसामुळे जिल्ह्यातील भातशेतीची कामे वेगात सुरू असून आतापर्यंत १२ हजार हेक्टरवर भातलागवड झाली आहे. 

जिल्ह्यात गेल्या २४ तासांत सरासरी ४१.७७ मिमी. पावसाची नोंद झाली. त्यात मंडणगड येथे ०.५, दापोली येथे ७.७०, खेडमध्ये ३३.३०, गुहागरमध्ये २०.८०, चिपळूण येथे २५.३०, संगमेश्वरमध्ये ७६.४०, रत्नागिरीत ८३.००, राजापुरात ५३.३०, लांजा येथे ७४.८० मिमी. पावसाची नोंद झाली आहे. 

राजापूर तालुक्यातील मौजे शिवणे बु. येथील प्रभाकर पांडुरंग भोसले (पोलिस पाटील) यांच्या घरावर फणसाचे झाड पडल्याने घराचे अंशत: नुकसान झाले. रत्नागिरी तालुक्यात शिरगाव येथे वडाचे मोठे झाड कोसळले. सुदैवाने या मार्गावर वाहतूक सुरू नव्हती. त्यामुळे अनुचित प्रकार घडला नाही. ते झाड काढण्याचे काम युद्धपातळीवर सुरू होते. समुद्राला आलेल्या उधाणाने मिऱ्या पंधरामाड येथील बंधाऱ्याला भगदाड पडले असून, एक नारळाचे झाड वाहून गेले आहे. 

दरम्यान, समाधानकारक पाऊस पडत असल्यामुळे जिल्ह्यात शेतीची कामे वेगाने सुरू आहेत. मागील आठवड्यात पाच हजार हेक्टरवर भातलागवड झाली होती. खतेही उशिराने दाखल झाली असली, तरीही लागवडीच्या तोंडावर खते मिळाल्याने शेतकरी समाधानी आहेत. आतापर्यंत सुमारे १२ हजार हेक्टरवर भातलागवड पूर्ण झाल्याचे कृषी विभागाकडून सांगण्यात आले.