अकोला   ः सध्या पीककर्ज काढण्यासाठी सात-बारा उतारा व इतर कागदपत्रांची शेतकऱ्यांना आवश्‍यकता आहे. दुसरीकडे लॉकडाउन सुरु असल्याने ही कागदपत्रे मिळवताना, अधिकाऱ्यांच्या भेटी घेताना अनेक ठिकाणी शेतकरी मेटाकुटीला आले आहेत. अशा परिस्थितीत मोताळा (जि. बुलडाणा) तालुक्यातील तलाठ्यांनी शेतकऱ्यांना घरपोच सात-बारा उतारा देण्याचा निर्णय घेत एक पाऊल पुढे टाकले आहे. या निर्णयाचे तहसीलदारांसह प्रशासनाकडूनही कौतुक केले जात आहे. 

खरीप हंगाम तोंडावर आला आहे. हंगामासाठी पीककर्ज गरजेचे असल्याने शेतकरी कागदपत्रांची जुळवाजुळव करीत आहेत. यात प्रामुख्याने सातबारा, नमुना आठ अ ही कागदपत्रे तलाठ्यांकडून घ्यावी लागतात. लॉकडाउनमुळे शेतकऱ्यांना घराबाहेर, गावाबाहेर पडणे अडचणीचे झालेले आहे. त्यातच शेतीची कामे सुरु झाली आहेत. अशा परिस्थितीत ही कागदपत्रे मिळवण्यासाठी तालुक्याला जाणे, तलाठी यांच्या भेटी घेणे जुळून येत नाही. तसेच गर्दी टाळून सोशल डिस्टन्स पाळणेही गरजेचे आहे. शेकऱ्यांची ही अडचण लक्षात घेत मोताळा तालुक्यातील तलाठ्यांनी सकारात्मक पाऊल उचलत थेट घरपोच सात-बारा उतारा देण्याचा निर्णय घेतला.

सोमवारपासून (ता.४) याची अंमलबजावणी सुरु करण्यात आली आहे. शेतकऱ्यांनी तलाठ्यांना मेसेज करून किंवा फोनवर संपर्क साधत आपल्या शेताचा गटनंबर, कोणाच्या नावे सातबारा हवा आणि इतर कुठली कागदपत्रे हवी आहेत हे सांगितले की त्यांना कागदपत्रे घरपोच पोचविण्याची व्यवस्था करण्यात आली आहे. या विभागात अशा प्रकारचा हा पहिला उपक्रम असल्याचे सांगितले जात आहे.